Վերաքննիչ քրեական դատարանը վարույթ է ընդունել Ռ. Քոչարյանի պաշտպանների բողոքը
Վերաքննիչ քրեական դատարանը, դատավոր Մխիթար Պապոյանի նախագահությամբ, վարույթ է ընդունել Մարտի 1-ի գործով ամբաստանյալ Ռոբերտ Քոչարյանին գրավի դիմաց ազատ չարձակելու նոյեմբերի 7-ի որոշման դեմ նրա պաշտպանների բողոքը:
Գործով դատական նիստ է նշանակվել նոյեմբերի 26-ին: Նշենք, որ նույն օրը նշանակված է նաեւ Ռոբերտ Քոչարյանի և մյուսների գործով դատական նիստը:
Հիշեցնենք, որ նոյեմբերի 7-ին Երեւանի ընդհանուր իրավասության դատարանի դատավոր Աննա Դանիբեկյանը որոշել էր մերժել Քոչարյանի պաշտպանների՝ գրավի դիմաց ազատ արձակելու վերաբերյալ միջնորդությունը, որի հիմքում վերջիններս դրել էին Սահմանադրական դատարանի հոկտեմբերի 15-ի ՍԴՈ-1480 որոշումը: Դրանով ՍԴ-ն, ի թիվս այլնի, արձանագրել է, որ գրավը ճանաչվել է որպես ինքնուրույն խափանման միջոց՝ դադարելով լինել կալանավորմանը այլընտրանքային խափանման միջոց, ուստի այն կարող է կիրառվել ոչ միայն անձի թաքնվելու, այլ նաեւ խոչընդոտելու ռիսկը զսպելու պարագայում: Սա պաշտպանական կողմը դիտել էր որպես նոր ի հայտ եկած հանգամանք:
Միջնորդության մերժումից հետո պաշտպանական կողմը բողոքարկել էր դատարանի որոշումը:
