Փաշինյանն ու Իտալիայի վարչապետը անդրադարձել են Լիբանանի ու Ղարաբաղի խնդիրներին

Իտալիան Հայաստանի երկրորդ առևտրատնտեսական գործընկերն է ԵՄ–ում։ Այս մասին այսօր Իտալիայի Հանրապետության նախարարների խորհրդի նախագահ Ջուզեպե Կոնտեի հետ առանձնազրույցից հետո  ԶԼՄ ներկայացուցիչների համար հայտարարության մեջ ասել է ՀՀ վարչապետ Նիկոլ Փաշինյանը։

«Ուրախությամբ պետք է նշեմ, որ այս տարի այս բնագավառում շոշափելի դինամիկա  է արձանագրվել։ Հայ–իտալական առևտրատնտեսական հարաբերությունները նոր բովանդակությամբ հագեցնելու համար առկա են բոլոր անհրաժեշտ նախադրյալները։ ԵԱՏՄ–ին Հայաստանի անդամակցությունն ու ԵՄ–ի հետ սերտ համագործակցությունը պարարտ հող են ստեղծում ներդրումների ներգրավման համար»,– ասել է Փաշինյանը։

Վարչապետը նշեց, որ Իտալիայի նախարարների խորհրդի նախագահի հետ երկուստեք բարձր են գնահատել հայ– իտալական միջկառավարական հանձնաժողովի աշխատանքը` համոզմունք հայտնելով, որ մոտ ապագայում հնարավոր կլինի հանձնաժողովի հաջորդ նիստն անցկացնել Երևանում։

Խոսելով Իտալիայի վարչապետի հետ բանակցությունների արդյունքների վերաբերյալ, Փաշինյանն ասել է, որ Հայաստանի համար ցանկալի է, որ Իտալիան առավել ներգրավված լինի ՀՀ կրթական համակարգում, որի շնորհիվ Հայաստանում հնարավոր կլինի ավելի լավ ծանոթանալ իտալական մշակույթին ու պատմությանը։

Երկու երկրների վարչապետերի հանդիպմանը չի շրջանցվել նաև ղարաբաղյան հակամարտության թեման։

«Գործընկերոջս ներկայացրի ղարաբաղյան հակամարտության կարգավորման ներկա իրավիճակը` վերահաստատելով Հայաստանի պատրաստակամությունը` շարունակել աշխատանքը ԵԱՀԿ ՄԽ համանախագահների միջնորդությամբ հակամարտության խաղաղ կարգավորման ուղղությամբ»,–ասաց Փաշինյանը։

Գործընկերներն անդրադարձել են նաև Լիբանանում ՄԱԿ–ի խաղաղապահ ուժերի` Իտալական հրամանատարության ներքո իրականացվող Հայաստանի խաղապահ առաքելությանը, ինչը կողմերի համոզմամբ` երկու երկրների միջև փոխադարձ հարգանքի ու վստահության օրինակ է։

«Մտքեր փոխանակեցինք նաև սիրիական ճգնաժամի շուրջ, մտահոգություն հայտնեցինք Թուրքիայի զինված ուժերի կողմից Սիրիայի հյուսիս– արևելյան շրջաններ ներխուժելու վերաբերյալ»,–հայտնեց ՀՀ վարչապետը։

Նիկոլ Փաշինյանը նաև համոզմունք հայտնեց, որ Իտալիայի նախարարների խորհրդի նախագահի հետ հանդիպումը նոր լավատեսական լիցք կհաղորդի երկկողմ հարաբերություններին, և  որ հայ–իտալական օրակարգը կհամալրվի նոր նախաձեռնություններով։

Հիշեցնենք` նոյեմբերի 20-22-ը ՀՀ վարչապետ Նիկոլ Փաշինյանը տիկնոջ՝ Աննա Հակոբյանի հետ, պաշտոնական այցով Իտալիայի Հանրապետությունում է: