ՏԵՍԱՆՅՈՒԹ. 23-ամյա Սաթենիկի աչքերից կրկին «ապակիներ» են հոսում. բուժումը չի օգնում
Համացանցում հայտնված հերթական տեսանյութը «ապակե արցունքներով» 23-ամյա աղջկա մասին, նորից մեծ հետաքրքրություն է առաջացրել ու դարձյալ տարբեր մեկնաբանությունների առիթ տվել:
Շիրակի մարզի Սպանդարյան գյուղի բնակիչ Սաթենիկ Ղազարյանի աչքից Արթիկի բժշկական կենտրոնում նորից հեռացրել են բյուրեղներ, որոնք մեկ ամիս է` անհետացել էին:
Հիշեցնենք` այս երևույթն արժանացավ ոչ միայն հայ, այլև ռուս մասնագետների ուշադրությանը: Ռուսաստանցի բժիշկները փորձաքննությամբ պարզեցին, որ աղջկա աչքից հանված բյուրեղները տարբեր չափերի ապակու կտորներ են և որ դրանք աչքում չեն ձևավորվում:
Սաթենիկին Արթիկի հիվանդանոցում նորից ակնաբույժն է զննել: Մեկ ամիս է` Սաթենիկի աչքից բյուրեղներ չէին գալիս: Դադարել էր գալ Երևանի «Շենգավիթ» բժշկական կենտրոնում դեղորայք կաթեցնելուց հետո: Նման բան տեղի էր ունեցել երկու ամիս առաջ, դարձյալ դեղորայքի ազդեցությունից: Ուժեղ գլխացավերն ու ինքնազգացողության վատացումը, դեմքի աջ հատվածի ցավերը ստիպել էին երեկ դիմել բժշկի:
Արթիկի հիվանդանոցի ակնաբույժը աչքից դուրս է բերել ապակու երկու կտոր, որին ներկա է եղել ու պահը ֆիքսել է հիվանդանոցի ատամնաբույժը:
Ի դեպ, առաջին անգամ Սաթենիկի աչքում տեսել ու «ապակե բյուրեղները» հեռացրել է ակնաբույժ Աննա Ստեփանյանը: Ակնաբույժ Աննա Ստեփանյանը հավաստիացնում է, որ աչքից հանված ապակիների մեջ եղել են նաև գունավորները: Ինքն է Սաթենիկին ուղղորդել դիմել Երևանի կլինիկաներ:
Ռուս մասնագետների փորձաքննության արդյունքները փաստել են` բյուրեղները աղջկա աչքում չեն ձևավորվում, որ դրանք սովորական ապակի են: Դրանից հետո Սաթենիկի ընտանիքին խորհուրդ էին տվել դիմել նյարդաբանի կամ հոգեբույժի օգնությանը:
Այդ ժամանակ հայտնի դարձավ, որ Սաթենիկը փոքր հասակում էպիլեպսիայի նոպաներ է ունեցել: Տեղի բժշկական կենտրոնում նրան հետազոտել է նյարդաբանը: Բայց, ըստ բժշկի, այս ախտորոշումն ունեցողը չի կարող նման կերպ ինքնացավեցնելու ֆունկցիաներ դրսևորել:
Տեսանյութը Shantnews-ի:
