Վարչապետը չի կարող աշխատավարձ բարձրացնել, պաշտոնատար անձինք պետք է հաստատեն. Պետրոսյան

ՀՀ ԱԺ ԲՀԿ խմբակցության անդամ Գևորգ Պետրոսյանը ԱԺ-ում լրագրողների հետ զրույցում անդրադարձավ նախարարների աշխատավարձերի բարձրացման մասին լուրերին:

«Ես գտնում եմ, որ ճիշտ կլինի եթե կա՛մ վարչապետը, կա՛մ մամուլի խոսնակը հստակ արտահայտված գնահատական տան՝ դա ճիշտ է, ճիշտ չէ: Որովհետև լինում են երբեմն թվացող լուրեր: Պաշտոնատար անձինք պետք է հաստատեն: Չհերքելն ուրիշ է: Գուցե, խրախուսում է եղել, բայց եթե, իրոք, աշխատավարձ ա բարձրացվել, դա չի կարող վարչապետն անել նույնիսկ ամենամեծ ցանկության դեպքում, քանի որ Հայաստանում գործում է դեռևս 2013-ին ընդունված պետական ծառայության պաշտոններ զբաղեցնող անձանց վարձատրության մասին օրենքը: Օրենքով վարչապետն իրավունք չունի միանձնյա որոշելու, աշխատավարձի փոփոխությունը վերապահված է ԱԺ-ին»:

Իսկ գաղտնի պահելու խնդրին անդրադառնալով՝ նշեց, որ ինչը պետք է գաղտնի պահվի՝ չի պահվում, և հակառակը:

«Ես գաղտնի պահելու բան չեմ տեսնում: Հակառակը, ՀՀ քաղաքացին պիտի իմանա, թե իր հաշվին աշխատավարձ ստացող պետակլան պաշտոնյան ինչի համար է ստանում աշխատավարձ»:

Հրայր Թովմասյանի շուրջ ծագած խոսակցությունների մասին Գևորգ Պետրոսյանը շեշտեց, որ արտահայտություններում պետք է զգույշ լինել:

«Առաջին փոխվարչապետն ասաց՝ այդտեղ քաղաքական խնդիր կա: Վաղը դա մեր քթից են բերելու, որ ամենաապաքաղաքական մարմնի մասին ասում ենք քաղաքական խնդիր կա»: