Խորհրդականները Թրամփին առաջարկել են Թուրքիային սպառնալ Հայոց ցեղասպանության ճանաչումով

Թուրքիային ցանկալի հունի մեջ դնելու, Սիրիայում թուրքական բանակի առաջխաղացումը թույլ չտալու համար ԱՄՆ նախագահի խորհրդականները նրան առաջարկել են սպառնալ Հայոց ցեղասպանության ճանաչմամբ։ Այս մասին հայտնի է դարձել ամերիկյան Newsweek լրատվական կայքին։

Դա մեկն է մի քանի տարբերակներից, որ առաջարկել են խորհրդականները։ Ընդ որում՝ խոսքը ոչ թե հենց ճանաչման մասին է, այլ սպառնալիքի, որ ԱՄՆ-ն կարող է 1915-1923 թվականների Օսմանյան կայսրությունում 1,5 միլիոն հայերի, ինչպես նաև հարյուրհազարավոր հույների ու ասորիների կոտորածները ճանաչել որպես ցեղասպանություն։

Ներկայում երկու երկրների լարված հարաբերություններում «հրադադար» է՝ բանակցային փուլ։ Այդ ժամանակը ընձեռնվել է այն բանից հետո, երբ Միացյալ Նահանգները և Թուրքիան համաձայնության են հասել, որ թուրքական բանակը 5 օր ժամանակ կտա քրդական ուժերին Սիրիայի հյուսիսից հեռանալու համար։