Սերժ Սարգսյանը գտնվում է Արցախում եւ հավաքել է իր թիմակիցներին. Վահան Բադասյան
Արցախի ռազմական-քաղաքական գործիչ Վահան Բադասյանը, Armtimes.com-ի հետ զրույցում, անդրադառնալով Նիկոլ Փաշինյանի կառավարության կողմից,Հայաստանն ու Արցախը կործանման տանելու մասին Բալասանյանի հայտարարություններին, ասել է. «Սերժ Սարգսյանը գտնվում է Արցախում եւ հավաքել է իր թիմակիցներին, ավելի շուտ՝ ոչ թե թիմակիցներին, այլ մաֆիային. դա թայֆա է, երկրակործան թայֆա: Վիտալի Բալասանյանը երկար ժամանակով նրանցից անջատվել էր, եւ ինքը, մեծ ջանքեր գործադրելով, միացավ 2016 թվականի այդ թայֆային եւ սկսեց սպասարկել նրանց: Ցավալի է, բայց փաստ է: Այդ բոլոր մարդիկ, այդ թայֆայի բոլոր անդամները թող նայեն իրենց կենսագրությանը, թող նայեն իրենց գործունեությանը եւ տեսնեն՝ ով է մինչեւ հիմա կործանել Հայաստանը»:
Արցախի ԱԺ նախկին պատգամավորը կարծում է, որ Սերժ Սարգսյանի թիմը փորձում է ճշտել իր անելիքները: «Հայաստանի իշխանություններին մնում է ճիշտ գործել եւ ճշմարիտ որոշում կայացնել: Օրինակ օգոստոսի 5-ի Նիկոլ Փաշինյանի արած արտահայտությունը շատ տեղին էր եւ շատ լավ ընդունվեց արցախցիների կողմից»,- նշել է նա:
