Ցանկացած նման միջադեպ կարող է վնաս հասցնել ՀՀ-ի միջազգային վարկանիշին. Անի Սամսոնյան
ԱԺ ԼՀԿ խմբակցության պատգամավոր Անի Սամսոնյանը գրում է.
«Հարգելի գործընկերներ, հայտնի է, որ հարձակում է տեղի ունեցել «Հայելի» լրատվամիջոցի վրա մի խումբ անձանց կողմից։
Հայաստանում պաշտպանված է տեղեկատվության և արտահայտվելու ազատությունը։
Լրատվական գործունեություն իրականացնողները և լրագրողները գործում են ազատորեն` իրավահավասարության, օրինականության, խոսքի (արտահայտվելու) ազատության և բազմակարծության սկզբունքների հիման վրա: Լրագրողն իր մասնագիտական օրինական գործունեության ընթացքում, որպես հասարակական պարտք կատարող անձ, պաշտպանվում է Հայաստանի Հանրապետության օրենսդրությամբ:
(Զանգվածային լրատվության մասին ՀՀ օրենք, Հոդված 4)։
Կոչ եմ անում ձեռնպահ մնալ լրատվամիջոցների և լրագրողների նկատմամբ ոնտձգություններից, որը կարող է վնասել լրագրողի գործունեությանը, տեղեկավություն ստանալու ազատությանը և առհասարակ ազատ մամուլին, ինչպես նաև` իրավապահ մարմիններին` ցուցաբերել զգոնություն և օպերատիվ արձագանքել ցանկացած միջադեպի:
Հիշեցնեմ նաև, որ «Լրագրողներ առանց սահմանների» միջազգային կազմակերպությունը այս տարի հրապարակեց աշխարհում մամուլի ազատության ինդեքսը (2019 World Press Freedom Index), որտեղ Հայաստանը 2019թ.-ի սանդղակում առաջընթաց է գրանցել 19 կետով՝ 79-րդ տեղից զբաղեցնելով 61-րդ տեղը։
Ցանկացած նման միջադեպ կարող է վնաս հասցնել ՀՀ-ի միջազգային վարկանիշին։
