Գասպարյանի նկատմամբ քրեական հետապնդումը անհապաղ դադարեցնելու բողոք է ներկայացրել նրա պաշտպանը
ՀՀ նախկին ոստիկանապետ Վլադիմիր Գասպարյանի նկատմամբ ընտրված խափանման միջոց ստորագրությունը չհեռանալու մասին որոշումը բողոքարկվել է:
Այս մասին լուրը Tert.am-ի հետ զրույցում ասաց ՀՀ նախկին ոստիկանապետ Վլադիմիր Գասպարյանի պաշտպան Տիգրան Աթանեսյանը:
«Գլխավոր դատախազին բողոք եմ ներկայացրել Գասպարյանի նկատմամբ խափանման միջոց ընտրելու որոշման վերաբերյալ: Բացի այդ, Վլադիմիր Գասպարյանի նկատմամբ քրեական հետապնդումը անհապաղ դադարեցնելու մասին բողոք է ներկայացվել՝ հանցակազմի բացակայության հիմքով»,-ասաց Աթանեսյանը:
Հիշեցնենք, որ ՔԿ-ում հարուցված քրեական գործով Վլադիմիր Գասպարյանին մեղադրանք է առաջադրվել ՀՀ քրեական օրենսգրքի 375-րդ հոդվածի 2-րդ մասով՝ իշխանությունը չարաշահելը, որն անզգուշությամբ առաջացրել է նյութական ծանր հետևանքներ:
Աթանեսյանն ասաց, որ իրավաչափ չէ այդ հոդվածով իր պաշտպանյալին մեղադրանք առաջադրելը, որովհետև Քրեական օրենսգիրքը խմբագրվել է և այդ հոդվածը սկսել է գործել 2013-ից։ Այնինչ, Աթանեսյանի խոսքով՝ ենթադրյալ արարքները, որոնք վերագրվում են Վլադիմիր Գասպարյանին, տեղի են ունեցել 2002-ից 2011թթ:
