ՎՏԲ-ն ուզում է կառավարությանը նվիրել Թեղուտի հանքը

ՎՏԲ բանկը պատրաստակամություն է հայտնել Թեղուտի հանքը հանձնել կառավարությանը։ 

Վարչապետ Նիկոլ Փաշինյանը Վանաձորում մամուլի ասուլիսի ժամանակ հաստատել է տեղեկությունը, սակայն շատ մանրամասներ դրա մասին չի ասել։

«Ուղղակի այդ հայտարարություններն ընդունենք ի գիտություն, որ բացասական ազդեցություն գործընթացի վրա չունենա»,- ասել է նա։

«Պարոն Կոստինը (ՎՏԲ բանկի նախագահ՝ խմբ․) դեռ Սանկտ Պետերբուրգում (հավանաբար՝ հունիսին Պետերբուրգում կայացած տնտեսական ֆորումի ժամանակ՝ խմբ․) ինձ հետ զրույցում ասել է, որ պատրաստ են նվիրել հանքը կառավարությանը։

Հիմա հարց կլինի՝ բանկը պատրաստ է հանքը նվիրել, կառավարությունը պատրաստ է ընդունել, բա ինչի՞ դա տեղի չի ունենում։ Որովհետև որոշակի դատական վեճեր կան։ Արձանագրենք, որ այսպիսի իրավիճակ ունենք, հետագա զարգացումը մաքսիմալ արդյունավետ կփորձենք կազմակերպել», - նշել է վարչապետը։