«Ժամանակ». Քոչարյանի «աջակից»՝ միլիոնի դիմաց. նոր ակտիվիստներ են փնտրում

«Ժամանակ» թերթը գրում է. «Մարտի 1-ի գործով մեղադրյալ Ռոբերտ Քոչարյանը կանոնավոր է դարձրել ակտիվիստների վճարումը։

Մեզ հասած տեղեկություններով՝ յուրաքանչյուր քսանյակի ղեկավարը ամիսը կես միլիոն դրամ է ստանում։ Քսանյակի ղեկավարը պատասխանատու է ակցիաների ժամանակ ակտիվիստների մասնակցության համար։ Ակցիայից հետո մասնակիցները ստանում են իրենց հասանելիք գումարը։

Մեզ հասած տեղեկություններով՝ ավելի մեծ գումարներ են ստանում գրասենյակների ղեկավարները, իրեն սատարող նախկինում այս կամ այն կերպ աչքի ընկած քաղաքական դեմքերը։ Փողը բաժանում է Արմեն Թավադյանը, իսկ արդեն ակտիվիստների գործողությունները կազմակերպում են անձամբ Քոչարյանի տղան՝ Լևոն Քոչարյանն ու փեսան՝ Վիգեն Չատինյանը։

Մեզ պատմեցին, որ դատավարության վերսկսմամբ պայմանավորված՝ քոչարյանական թիմն ակտիվորեն լծվել է նոր ակտիվիստների փնտրտուքի գործին։ Նրանք հասկանում են, որ դատավարությունը երկար է տևելու, և դատարանի բակում «հերոս» գոռացողները երկար չեն ձգի։ Ուշագրավն այն է, որ չնայած վարչապետի խոսնակը հայտարարել էր, որ Քոչարյանին փողով են սատարում, ԱԱԾ-ն առ այսօր նման մեծ փողերի շրջանառության որևէ բացահատում չի արել»։

Առավել մանրամասն՝ թերթի այսօրվա համարում: