Ամուլսարի հանքը փակելու համար պետք է լինեին իրավական հիմքեր. Բաբկեն Թունյան
Ամուլսարի հանքը փակելու համար պետք է լինեին իրավական հիմքեր: Սեպտեմբերի 9-ին խորհրդարանում լրագրողների հետ զրույցում նման տեսակետ հայտնեց ԱԺ «Իմ քայլը» խմբակցության անդամ Բաբկեն Թունյանը:
«Ես վարչապետի ելույթից էդ հատվածը լսեցի, որ այս պահին իրավական հիմքեր չկան: Եթե էդ մի տարվա ընթացքում իրավական հիմքեր առաջ կգան, որ թույլ կտան փակել, նշանակում է՝ այդ ժամանակ որոշակի գործողություններ կլինեն: Իսկ այս տարբերակով, երբ առանց իրավական հիմքի դուք ուղղակի թողնում եք, որ այդ ընկերության աշխատանքը կազմաքանդվի, դա ուղղակի անընդունելի է, Հայաստանին որպես պետություն դարձնում է կասկածելի, անվստահելի գործընկեր»,- ասաց նա:
Դիտարկմանը՝ հնարավո՞ր է ճանապարհը բացելու համար ոստիկանության օգնությունը պահանջվի, Թունյանն արձագանքեց.
«Հույս ունեմ՝ բանը ոստիկանությանը չի հասցնի, քանի որ մեր հասարակությունը շատ գիտակցված որոշում կարող է կայացնել: Բավական է, որ կարծրատիպային մտածելակերպից շեղվեն ու հարցին փորձեն երկու կողմից նայել: Ռիսկը մնում է այդ ընկերության վրա, ինքը ծախս է կատարում, չէ՞, հիմա կարող է՝ մեկ տարի ծախս է կատարում, հետո պարզվում է՝ խախտումներ կան, ու այդ ծախսը ոչ ոք չի կատարի, սա փոխհատուցման շատ նորմալ տարբերակ է»:
