Ցոլակյանը մեքենա է նվիրել հոգնածության պատճառով վթարի ենթարկված 2 աշխատակցի
Տղաներից մի քանիսը դեպքի վայրում մի քանի օր անընդմեջ տքնելուց հետո այն աստիճանի են ուժասպառ եղել, որ տունդարձի ճանապարհին վթարի են ենթարկվել, բայց հաջորդ օրը նորից շտապել են դեպքի վայր։
Այսօր մոլորակի, թերևս, ամենամարդասիրական ուժային կառույցի՝ Արտակարգ իրավիճակների նախարարության աշխատակցի օրն է:
Այս մասին Facebook սոցիալական ցանցի իր էջում գրել է ԱԻ նախարար Ֆելիքս Ցոլակյանը՝ մասնագիտական տոնի առթիվ շնորհավորելով իր ղեկավարած կառույցի աշխատակիցներին:
Ցոլակյանը նշել է, որ հոկտեմբերի 1-ից փրկարարների աշխատավարձը կբարձրանա: Դրանից բացի, փրկարարական գույք ձեռք բերելու համար կառավարությունը վերջին շրջանում պետական բյուջեից նախարարությանը տրամադրել է ավելի քան 260 միլիոն դրամ, հրշեջ-փրկարարական ջոկատների վերանորոգման համար՝ մոտ 1 միլիարդ դրամ:
ԱԻ նախարարը նշել է, որ արտակարգ իրավիճակների և հատկապես հրդեհների առումով՝ այս տարին աննախադեպ էր ողջ աշխարհի համար:
Հայաստանում հրդեհների քանակն ու մասշտաբներն այնքան մեծ են եղել, որ հրդեհաշիջման աշխատանքներին ներգրավվել է նաև փրկարար ծառայության կենտրոնական ապարատը:
«Գուցե զավեշտալի թվա, բայց այսօրվա հանդիսավոր շքերթի նախապատրաստական աշխատանքներին անգամ փրկարար չէինք կարողանում գտնել, որ փորձերին մասնակցի: Բոլորը հրդեհաշիջմանն էին մասնակցում»,-գրել է նախարարը՝ փաստելով, որ փրկարարները, և հատկապես շարքային կազմի տղաները, պատվով են կատարել իրենց առջև դրված խնդիրը՝ անմիջական վտանգի տակ դնելով սեփական կյանքերը:
Տղաներից մի քանիսը դեպքի վայրում մի քանի օր անընդմեջ տքնելուց հետո այն աստիճանի են ուժասպառ եղել, որ տունդարձի ճանապարհին վթարի են ենթարկվել, բայց հաջորդ օրը նորից շտապել են դեպքի վայր:
«Ի՞նչ է սա, եթե ոչ հերոսություն:
Կրկին շնորհավորելով ԱԻՆ բոլոր աշխատակիցների մասնագիտական տոնի առթիվ, նախարար Ցոլակյանը գրել է, որ ԱԻ երկու աշխատակցի մեքենայով պարգևատրելու որոշում է կայացրել.
«Փրկարարներից մի քանիսը հոգնածության, ծանրաբեռնվածության պատճառով՝ դեպքի վայրից տունդարձի ճանապարհին վթարի են ենթարկվել, որոնցից երկուսի՝ Փ/Ծ փոխգնդապետ Գարեգին Հակոբյանի և Փ/Ծ ավագ սերժանտ Անդրանիկ Ղազարյանի ավտոմեքենաները գրեթե վերածվել էին մետաղի ջարդոնի: Ես չգիտեմ, ունեմ դրա իրավունքը թե ոչ, բայց բացառիկ որոշում եմ կայացրել, որոշել եմ ԱԻՆ ողջ անձնակմի անունից տղաներին պարգևատրել նույնանման ավտոմեքենաներով:
Խիղճ և խաղաղություն բոլորիս…»,-իր շնորհավորակական ուղերձը եզրափակել է ՀՀ ԱԻ նախարար Ֆելիքս Ցոլակյանը:
