Պատրաստվում ենք աշնան նստաշրջանի աշխատանքներին. Լենա Նազարյան

Ինչպես արդեն հայտնել ենք, ԱԺ «Իմ քայլը» խմբակցության պատգամավոր Էդգար Առաքելյանը մանդատը վայր կդնի: ArmDaily.am-ի տեղեկություններով մանդատը վայր դնելու որոշման պատճառն այն է, որ ՔՊ վարչության նիստին պատգամավորը խիստ զայրացել է, երբ քննարկել են մի շարք խնդրահարույց հարցեր՝ այդ թվում Ամուլսարի հարցը, Ստամբուլյան կոնվենցիան, և նշել են, որ միակարծություն չկա:

Էդգար Առաքելյանը միակը չէ, ով դեմ է արտահայտվում հանքի շահագործմանը և չի բացառվում, որ «Իմ քայլ»-ում որոշ պատգամավորներ ևս հրաժարվեն մանդատներից: 

Մասնավորապես, մանդատից կարող է հրաժարվել ԱԺ փոխնախագահ Լենա Նազարյանը, ով ակտիվիստ լինելու ժամանակ ակտիվ պայքարում էր Ամուլսարի հանքի շահագործման դեմ, իսկ այժմ լռում է, խուսափում է հրապարակային կարծիք հայտնել, և Վարազդատ Կարապետյանը, ով բացահայտ հայտարարել է, որ դեմ է հանքի շահագործմանը, ինչպես նաև Գայանե Բաղդասարյանը:

ArmDaily.am-ը փորձեց պատգամավորներից մեկնաբանություն ստանալ, մեր այն հարցին՝ արդյո՞ք պատրաստվում է վայր դնել մանդատը՝ Լենա Նազարյանը կարճ պատասխանեց.«Պատրաստվում ենք աշնան նստաշրջանի աշխատանքներին», իսկ Վարազդատ Կարապետյանի հետ կապ հաստատել չհաջողվեց։