Ինչու են տապին բնակիչները մնում առանց ջրի. «Վեոլիա Ջրի» պարզաբանումը. NEWS.am
Երեւանի Արտաշիսյան 54-62 շենքերի բնակիչները երեք օր շարունակ՝ հուլիսի 20-22–ը, ջուր չեն ունեցել, իսկ շաբաթ եւ կիրակի օրերին «Վեոլիա Ջուր» ընկերության թեժ գիծ զանգահարած քաղաքացիներին օպերատորները ասել են, որ շաբաթ եւ կիրակի օրերին չեն կարող առաջացած վթարը կարգավորել։ NEWS.am-ի հարցմանն ի պատասխան «Վեոլիա Ջուր» ընկերությունից հայտնել են, որ Արտաշիսյան 54-62 շենքերի ջրամատակարարման ռեժիմը օրերս խախտվել էր՝ դրանք սնուցող բակային պոմպակայանի խափանման պատճառով.
«Վթարը եղել է բարդ, պոմպի փոխարինման ընթացքում առաջացել են լրացուցիչ տեխնիկական դժվարություններ: Դրանով պայմանավորված, ջրամատակարարման վերականգնումը ժամանակ է պահանջել: Այստեղից էլ բնակիչների դժգոհությունը»:
Հուլիսի 12-ից խմելու ջուր չունեն Արարատի մարզի Տափերական գյուղի բնակիչները։ Այս առնչությամբ «Վեոլիա Ջուր» ընկերությունից մեզ հայտնում են, որ այստեղ «Վեոլիա Ջուր» ՓԲԸ-ի կողմից ջուրը մատակարարվում է համաձայն գրաֆիկի. «Նաեւ հարկ ենք համարում նշել, որ տվյալ բնակավայրի ջրամատակարարման ներքին ցանցում կարգավորումներն իրականացվում են համայնքապետարանի աշխատակցի կողմից, եւ հետեւաբար որեւէ հատվածում ջրամատակարարման խնդրի առաջացման դեպքում հարկավոր է դիմել համայնքապետարանին»:
Ավելի վաղ ջրամատակարարման խնդրից են բողոքում նաեւ Փոքր Վեդիի բնակիչները։ Այս առնչությամբ «Վեոլա ջուր» ընկերությունը հայտարարություն է տարածել. «Կիսելով Փոքր Վեդիում ջրի խնդրի հետ կապված բազմաթիվ սպառողների անհանգստությունը՝ «Վեոլիա Ջուր» ընկերությունը տեղեկացնում է, որ ձեռնարկվել են համապատասխան միջոցներ` խնդրի արմատական կարգավորման ուղղությամբ: Փոքր Վեդիում ջրի խնդիրը տասնամյակների պատմություն ունի, որի վկայությունը բնակիչների մեծածավալ ջրհորներն են:
Իրավիճակն առավել սրվում է ամռանն այն պատճառով, որ սպառողները խմելու ջուրն օգտագործում են նաեւ ոռոգման նպատակով: Ցավոք, օրերս խոշոր վթար տեղի ունեցավ «Գառնի-Լանջազատ» մայրուղային ջրատարի վրա, ինչը եւս բացասական ազդեցություն թողեց գյուղի ջրամատակարարման վրա: Ներկայումս խողովակաշարը վերանորոգվել է եւ գործում է ողջ հզորությամբ:
«Վեոլիա ջուր» ընկերությունը չի նվազեցրել Փոքր Վեդիին մատակարարվող ջրաքանակը, բայց քանի որ բնակիչները շտապում են լցնել իրենց ջրհորները, ջուրը չի բավականացնում գյուղի բոլոր թաղամասերին: «Վեոլիա Ջուր»-ն աշխատանքներ է իրականացրել նաեւ խնդրի արմատական լուծման ուղղությամբ:
1000 խորանարդ մետր ծավալ ունեցող գործող Օրվա Կարգավորիչ Ջրամբարի անմիջական հարեւանությամբ «Վեոլիա ջուր» ՓԲԸ նախաձեռնությամբ եւ միջոցներով կառուցվում է եւս մեկը, նույն տարողությամբ, որն ամենայն հավանականությամբ` կգործարկվի արդեն աշնանը:
Բացի այդ, դեպի Փոքր Վեդի շուրջ 3 կմ երկարությամբ ջրագիծ է կառուցվում զգալիորեն ավելի մեծ՝ 250մմ տրամագծով, գործող 150 մմ փոխարեն: Դա նշանակում է, որ արդեն տեսանելի ապագայում 2 անգամ ավելի շատ ջուր կստանան սպառողները, ինչը թույլ կտա Փոքր Վեդիում ապահովել բարվոք ջրամատակարարում»։
