Հուրգադայում մնացած մոտ 100 ՀՀ քաղաքացիների վերադարձը կկազմակերպի. տուրիստական կազմակերպության տնօրեն
Հուրգադայում գտնվող 100 ՀՀ քաղաքացիների՝ Հայաստան վերադարձնելու աշխատանքներում ներգրավված է նաև ԱԱԾ-ն: Այս մասին լրագրողների հետ զրույցում հայտնեց «Էյ Ընդ Ար» տուրիստական ընկերության տնօրեն Անի Ալեքսանյանի փաստաբան Արսեն Մկրտչյանը՝ հայտարարելով, որ այլ տեղեկություններ իրավասու չէ հայտնել: Այս մասին տեղեկանում ենք SHANTNEWS.am-ից:
Ավելի ուշ, տուրիստական կազմակերպության տնօրեն Անի Ալեքսանյանը լրագրողների հետ զրույցում հայտնեց, որ եղել է Ազգային անվտանգության ծառայությունում ու քննարկել է ստեղծված իրավիճակը: Իր խոսքերով՝ առաջիկայում բոլոր քաղաքացիների գումարները կվերադարձվեն:
Անդրադառնալով Հուրգադայում մնացած քաղաքացիներին՝ նա հայտարարեց, որ այժմ աշխատանքներ են իրականացվում՝ նրանց՝ Հայաստան վերադառնալու գործընթացը հնարավորինս արագ իրականացնելու ուղղությամբ:
Ինչպես ավելի վաղ հայտնել էինք, Եգիպտոսում ՀՀ դեսպանությունը տեղեկացրել է, որ հուլիսի 25-ին Հուրգադա-Երևան թիվ OTF 3703 չվերթի չեղարկման պատճառով Հուրգադայում ՀՀ մոտ 100 քաղաքացի կա։
Հուլիսի 25-ին Հուրգադա-Երևան թիվ OTF 3703 չվերթի չեղարկման պատճառով Հուրգադայում գտնվող 100 ՀՀ քաղաքացիների հարազատները բողոքի ակցիա են իրականացրել տուրիստական կազմակերպության գրասենյակի տարածքում:
