Այսօր շարունակվել է Մանվել Գրիգորյանի գործով դատական նիստը: Ամբաստանյալը նիստին չի ներկայացել առողջական վիճակի պատճառով: Դատավոր Մնացական Մարտիրոսյանը հայտարարել է, որ ներկայացվել է այդ մասին հավաստող փաստաթուղթ: Իսկ դատական նիստին ներկայացել էր փորձագետ, բժիշկ-էնդոկրինոլոգ Լուսինե Մամիկոնյանը:

«Ներկայացվել է փաստաթուղթ այն մասին, որ առողջական վիճակի պատճառով Գրիգորյանը նիստին մասնակցել չի կարող: Դատական նիստին ներկայացել է փորձագետ Լուսինե Մամիկոնյանը»,-հայտարարեց դատավորը:

Նա անձը հաստատող փաստաթուղթ պահանջեց, որը ներկայացնելուց հետո դատավորը դատավարության մասնակիցներին հիշեցրեց, որ փորձաքննություն նշանակելով՝ դատարանը նշել էր այն փորձագետների անունները, որոնց պաշտպանական կողմը խնդրել էր ներգրավել փորձաքննության կատարմանը: Հանձնաժողովի կազմում 4 անձանց անուններ էին նշվել:

Լուսինե Մամիկոնյանին հարց ուղղեց, թե արդյո՞ք տեղեկացված է, թե ինչի համար է ներկայացվել դատարան, ի՞նչ փորձաքննության մասին է խոսքը: Վերջինս նշեց, որ ավելի քան 10 տարվա բժիշկ-էնդոկրինոլոգի փորձ ունի, որևէ ազգակցական կամ այլ կապ չունի ամբաստանյալի հետ:

Դատավարության մասնակիցներից մեկը դատարանին խնդրեց պահանջել, որ փորձագետը ներկայացնի իր մասնագիտական փորձը վկայող փաստաթուղթ: Փորձագետը ժամանակ  խնդրեց: Նիստը հետաձգվեց և կշարունակվի 1.5 ժամ անց:

Տեսանյութը` Shantnews.am-ի։