Մինչև իրիկուն իմ երեխեն իմ կողքը չեղավ` մարդասպանություն կլինի. Իջևանի մարզպետարանի շրջակայքից բերման ենթարկվածի մայր
Մինչև երեկո երեխուս այստեղ չբերեցին՝ մարդասպանություն է լինելու, Իջևանի մարզպետարանի մոտ հայտարարեց քիչ առաջ մարզպետարանի տարածքից բերման ենթարկված 30-ամյա Գարիկ Մելիքսեթյանի մայրը:
Կինը պնդեց, որ երեկ որդին ցույցերին չի մասնակցել, քանի որ երեկ որդու հետ Հոկտեմբերյանում է եղել, վերադարձել են առավոտյան և որդին որոշել է շրջել մարզպետարանի տարածքով՝ տեսնելու, թե ինչ է կատարվել, մինչդեռ արդյունքում բերման է ենթարկվել:
«Քիչ առաջ երեխուս բռնել են ու անտեղի տեղը տարել: Առավոտյան ասեց՝ «գնամ տենամ՝ ինչա եղել», զանգեցին ասեցին՝ «երեխուդ տարել են»: Անմեղ տեղը երեխա են տանում: Հիմա կամ ես ինձ եմ սպանելու կամ տանողներին: Մինչև իրիկուն իմ երեխեն իմ կողքը չեղավ՝ մարդասպանություն կլինի, իմ երեխեն էս ցույցին չի մասնակցել», - նշեց կինը:
