Փոխնախարարը` համատարած հոսանքազրկման ժամանակ խափանված սարքավորումների մասին
ՀՀ տարածքային կառավարման և էներգետիկ ենթակառուցվածքների նախարարի տեղակալ Հակոբ Վարդանյանն այսօր լրագրողների հետ զրույցում անդրադարձել է նաև այն հարցին, թե ինչ տեղեկություններ կան խափանումների մասին:
«Դեռևս որևէ խոշոր խափանում հայտնի չէ: Տատանումների արդյունքում կարող են էլեկտրասարքավորումների կարգավորման դաշտերը փոխվել: Դրանց ծրագրերի նորից ներբեռնման խնդիրներ առաջանա: Պետք է ժամանակ անցնի, որպեսզի հասկանանք՝ ինչ է տեղի ունեցել բոլոր այն տեղերում, որտեղ տատանում է տեղի ունեցել, մատակարարման խափանում: Հուսով եմ, որ չունենք որևէ խոշոր խնդիր: Եթե արտադրող կայաններում կարգավորվի ամեն ինչը, կարծում եմ` մնացած տեղերում չենք ունեցել ավելի խոշոր խնդիր: Ամբողջությամբ չեմ տիրապետում` երկրում որտեղ ինչ է փչացել, ինչ է եղել, բայց չունենք նաև տեղեկություն, որ խոշոր ինչ-որ խափանումներ կան»,- ասել է Վարդանյանը՝ հավելելով, որ եթե պաշտպանիչ համակարգերն աշխատած չլինեին, 5-րդ բլոկն ու Երևանի ՋԷԿ-ն անջատված չէին լինի:
Հուսալի կերպով աշխատել են բոլոր պաշտպանիչ համակարգերը:
