«Վահե Գրիգորյանի հայտարարությունն առնչվում է սահմանադրական որոշակի դրույթների մեկնաբանությանը, իսկ, ինչպես գիտենք, Սահմանադրությունն ու սահմանադրական դրույթները կարող են մեկնաբանել բացառապես ՍԴ-ն և դատարանի դատավորը, հետևաբար, բոլոր մեկնաբանությունների համար Վահե Գրիգորյանին դիմեք»,- ասել է «Իմ քայլը» խմբակցության ղեկավար Լիլիթ Մակունցը, գրում է Shantnews.am-ը:

Լրագրողների հարցին` եթե կա ԱԺ կողմից ընտրված ՍԴ նախագահ, այժմ Վահե Գրիգորյանն ինչպե՞ս է պատրաստվում ստանձնել ՍԴ նախագահի պաշտոնը, Մակունցը պատասխանել է. «Մտադրությունների հետ կապված` ասեմ, որ դա յուրաքանչյուր թեկնածուի իրավունքն է որևէ փուլում որոշել իր մտադրությունները հանրայնացնել կամ չհանրայնացնել: Վահե Գրիգորյանը նպատակահարմար է գտել իր աշխատանքային մտադրությունների մասին տեղեկացնել երդման արարողության ընթացքում, և որևէ խնդիր ես չեմ տեսնում»,- ասել է Մակունցը և ևս մեկ անգամ շեշտել, որ սահմանադրական դրույթների մեկնաբանման համար դիմեն անձամբ Վահե Գրիգորյանին:

Լիլիթ Մակունցի խոսքով` Վահե Գրիգորյանի`  ՍԴ նախագահի պաշտոնը ստանձնելու մասին երեկվա հայտարարությունն իր համար անակնկալ է եղել:

«Ինձ համար անակնկալ էր»,- ասել է Մակունցը: