Մխիթարյանին խորհուրդ են տվել Բաքվում Հայաստանի դրոշը չծածանել. ՀՖՖ առաջին փոխնախագահի հարցազրույցը` CNN-ին

ՀՖՖ առաջին փոխնախագահ, Գլխավոր քարտուղար Արմեն Մելիքբեկյանը հարցազրույց է տվել CNN հեռուստաալիքին` խոսելով «Արսենալ»-ի կիսապաշտպան Հենրիխ Մխիթարյանի՝ Բաքու չմեկնելու որոշման մասին: «Պետք է ասեմ, որ Բաքու չմեկնելու որոշումը կայացվել է ակումբի և խաղացողի կողմից, և մենք կարծում ենք, որ ստեղծված իրավիճակում դա լավագուն որոշումն է: Մենք աջակցում ենք այդ որոշմանը: Որպես ՀՖՖ՝ հասկանում ենք, որ կան մի շարք պատճառներ, որոնցից մեկը հյուրընկալող երկրում այս հարցի չափազանց մեծ քաղաքականացնումն է»,-նշել է Մելիքբեկյանը: Ըստ Մելիքբեկյանի աղբյուրների՝ Մխիթարյանին խորհուրդ է տրվել Բաքվում հայկական դրոշը չցուցադրել: «Ինչպես կհիշեն ֆուտբոլասերները՝ նա հայկական դրոշը ծածանել է երկու տարի առաջ Ստոկհոլմում «Մանչեսթեր Յունայթեդ»-ի կազմում եզրափակչից հետո, երբ Հենիխը հանդիպման հերոսներից մեկն էր: Այսպիսով, երբ խոսում ենք անվտանգության մասին, պետք է նաև ապահվություն լինի հաղթանակի դեպքում խաղից հետո դրոշի ցուցադրման հարցում»,-ասել է նա: