Թու, թու, թու. ցրտահարություն 99 տոկոսով չի սպասվում. Ֆելիքս Ցոլակյան

Արտակարգ իրավիճակների նախարար Ֆելիքս Ցոլակյանը խոսեց սոցիալական ոլորտում ներկայացված խնդիրների՝ նպաստների ուշացման և գազալցակայաններում գազի գնի բարձրացման հարցերից հետո, հետևաբար, ելույթն սկսեց այսպես. «Այսքան վատ բան խոսելուց հետո, թու, թու, թու, հանրապետության հովտային և նախալեռնային շրջաններում ցրտահարություն 99 տոկոսվ չի սպասվում, ապրիլի և մայիսի տեղումների քանակը նորմայից ավելի է լինելու, հունիսին` նորմայի սահմաններում, ջերմաստիճանի փոփոխության հետ կապված` գետերի ելքերը մեծանալու են, անցած տարի եղել է 60-80 տոկոս, այս տարի 120, ջրառատ է լինելու. մենք ունենք գետերով նշած, թե որ գետերի համար: Այս մասին ինֆորմացիան տվել եմ և´ Տարածքային կառավարման նախարարություն, և´ մարզպետարաններ: Բոլորը տեղեկացված են, բայց կա այսպիսի բան, որ 3-4 օր առաջ մենք կարող ենք հստակ ասել՝ վարարում կարո՞ղ է լինել, թե՞ չէ, դա կախված է օդային ալիքներից և ինտենսիվ ալիքներից»: Խոսելով Սևանա լճի մակարդակի մասին՝ նա հայտնեց, որ այս պահին 7 սմ-ով պակաս է ջրի մակարդակը անցյալ տարվա համեմատ, բայց հետագայում առավել դրական արդյունք է լինելու: «Անցյալ տարի տաք էր կլիման, այս տարի ցուրտ է, հոսքը հետո է լինելու, 45 սմ մոտ կբարձրանա հունիսի 1-ին»: Այս ցուցանիշը անհավանական թվաց վարչապետին: «1-2 ամսվա մեջ 45 սանտիմե՞տր»,- զարմացավ Փաշինյանը: Ցոլակյանն արձագանքեց. «Այո´, կունենանք մոտ 570 մլն խմ ջուր ավել, որը էսօր, Արփա Սևանն էլ երեկ բացվել է, մոտ 150 մլն խմ ջուր էլ, որ պետք է գար տարվա վերջին, հունվարի 1-ի դրությամբ Սևանի մակարդակը 5-10 սմ ավելի կլինի էս տարվա համեմատ ջրառից հետո»: