Դատախազությունում պարգևատրվել են բոլորը` բացի գլխավոր դատախազից
ՀՀ գլխավոր դատախազության համակարգի բոլոր դատախազները պարգևատրվել են՝ բացառությամբ ՀՀ գլխավոր դատախազ Արթուր Դավթյանի։ Կարգապահական պատասխանատվության ենթարկված աշխատակիցները չեն պարգևատրվել։
Այս մասին Tert am-ի գրավոր հարցմանն ի պատասխան հայտնել են ՀՀ գլխավոր դատախազության հանրային կապերի բաժնից:
Լրատվամիջոցի փոխանցմամբ` պարգևատրումների վերաբերյալ գրավոր հարցմանն ի պատասխան Դատախազությունից հայտնել են. «Հայաստանի Հանրապետության դատախազության համակարգի բոլոր դատախազները՝ բացառությամբ ՀՀ գլխավոր դատախազի, 2019 թվականի հունվարի 8-ի` ՀՀ գլխավոր դատախազի հրամանով ստացել են պարգևատրում պետական բյուջեով նախատեսված աշխատավարձի ֆոնդից՝ աշխատավարձի դրույքաչափի 70 տոկոսի չափով (առանց հավելավճարների), իսկ քաղաքացիական ծառայողները, հայեցողական պաշտոններ զբաղեցնող, քաղաքացիական աշխատանք և տեխնիկական սպասարկում իրականացնող անձինք՝ աշխատավարձի դրույքաչափի 100 տոկոսի չափով (առանց հավելավճարների):
Սահմանված կարգի համաձայն` պարգևավճարներ չեն ստացել կարգապահական պատասխանատվության ենթարկված աշխատակիցները»։
