Ադրբեջանն ու Գերմանիան ստորագրել են ռազմավարական գործընկերության համատեղ հռչակագիր

Հուլիսի 21-ին Բեռլինում ստորագրվել է Ադրբեջանի Հանրապետության և Գերմանիայի Դաշնային Հանրապետության միջև երկկողմ ռազմավարական գործընկերության օրակարգի մասին համատեղ հռչակագիրը։

Փաստաթղթում կողմերը նշել են, որ ճանաչում են երկարամյա բարեկամական հարաբերությունները և վերահաստատում են երկկողմ գործընկերությունն ու համագործակցությունն առավել խորացնելու պատրաստակամությունը՝ փոխադարձ վստահության և ընդհանուր շահերի հիման վրա։ Նրանք նաև վերահաստատել են միմյանց ինքնիշխանության, անկախության և տարածքային ամբողջականության նկատմամբ հարգանքը, ինչպես նաև հավատարմությունը ՄԱԿ-ի կանոնադրությանը, Հելսինկյան եզրափակիչ ակտին, Մարդու իրավունքների եվրոպական կոնվենցիային և միջազգային իրավունքի այլ հիմնարար փաստաթղթերին։

Հռչակագրում նշվում է, որ կողմերը ողջունում են Ադրբեջանի և Հայաստանի հարաբերություններում արձանագրված առաջընթացը, մասնավորապես՝ 2025 թվականի օգոստոսի 8-ի Վաշինգտոնի գագաթնաժողովի արդյունքները և հարաբերությունների կարգավորմանն ուղղված հետագա քայլերը։ Գերմանիան վերահաստատել է իր լիակատար աջակցությունը երկու երկրների միջև կայուն խաղաղության հաստատման ջանքերին։

Կողմերը նաև ընդգծել են Ադրբեջանի և Եվրոպական միության միջև գործընկերության ռազմավարական նշանակությունը՝ կարևորելով քաղաքական երկխոսության և գործնական համագործակցության խորացումը, ինչպես նաև Ադրբեջանի և ԵՄ-ի միջև գործընկերության նորացված առաջնահերթությունների ընդունումն ու առկա երկխոսության մեխանիզմների լիարժեք օգտագործումը։

Նույն օրը Բեռլինում կայացել է նաև գերմանա-ադրբեջանական փաստաթղթերի ստորագրման արարողությունը։

Ադրբեջանի նախագահ Իլհամ Ալիևը և Գերմանիայի դաշնային կանցլեր Ֆրիդրիխ Մերցը ստորագրել են վերոնշյալ համատեղ հռչակագիրը, ինչպես նաև Ադրբեջանա-գերմանական գործարար խորհրդի ստեղծման և գործունեության մասին համատեղ հռչակագիրը։