Փաշինյանն ու Բախտաձեն զրուցել են հեռախոսով
Վրաստանի վարչապետ Մամուկա Բախտաձեն ՀՀ վարչապետի պաշտոնակատար Նիկոլ Փաշինյանին շնորհավորել է «Իմ քայլը» դաշինքի հաղթանակի կապակցությամբ և հաջողություն մաղթել նրան։ Այս մասին ֆեյսբուքյան իր պաշտոնական էջում հայտնում է Վրաստանում Հայաստանի դեսպանատան մամուլի ծառայությունը։
«Բախտաձեն շնորհավորել է Փաշինյանին Հայաստանում տեղի ունեցած արտահերթ խորհրդարանական ընտրությունները բարձր մակարդակով անցկացնելու և դրանցում «Իմ քայլը» դաշինքի համոզիչ հաղթանակի կապակցությամբ։ Վրաստանի վարչապետը հաջողություններ է մաղթել Նիկոլ Փաշինյանին և Հայաստանի կառավարությանը հետագա գործունեության մեջ և Հայաստանի տնտեսական զարգացմանը միտված ծրագրերի իրականացման գործում»,– նշված է հաղորդագրության մեջ:
Նիկոլ Փաշինյանը շնորհակալություն է հայտնել Մամուկա Բախտաձեին շնորհավորանքի համար և համոզմունք հայտնել, որ Հայաստանի և Վրաստանի կառավարությունները կշարունակեն արդյունավետ փոխգործակցությունը՝ ի շահ երկու բարեկամ պետությունների զարգացման և ժողովուրդների բարեկեցության:
