ՏԵՍԱՆՅՈՒԹ. Հովակիմյան․ մինչև օգոստոսի 2-ը Նարեկ Կարապետյանի գործով որոշումը ԿԸՀ-ի ձեռքում է

«Մինչև օգոստոսի 2-ը, եթե ընտրված պատգամավորներից որևէ մեկի, այդ թվում՝ Նարեկ Կարապետյանի նկատմամբ քրեական հետապնդում հարուցելու խնդիր առաջանա, դատախազությունը պետք է դիմի Կենտրոնական ընտրական հանձնաժողովին և ստանա համաձայնություն»։ Այս մասին հայտարարել է ԿԸՀ նախագահ Վահագն Հովակիմյանը։

Նրա խոսքով՝ դատախազությունը կրկին դիմել է ԿԸՀ՝ Նարեկ Կարապետյանի նկատմամբ քրեական հետապնդում հարուցելու համաձայնություն ստանալու համար։

«Եթե Կենտրոնական ընտրական հանձնաժողովը համաձայնություն չտա, քրեական հետապնդում չի կարող հարուցվել», — նշել է Հովակիմյանը։

ԿԸՀ նախագահի խոսքով՝ պատգամավորների լիազորությունների ստանձնումից՝ օգոստոսի 2-ից հետո, պատգամավորների նկատմամբ քրեական հետապնդում հարուցելու կամ նրանց ազատությունից զրկելու համար դատախազությունն արդեն պետք է դիմի Ազգային ժողովին։