Հայաստան-Ադրբեջան համաձայնագիրը նոր հնարավորություններ է բացում. Մերց

Գերմանիայի կանցլեր Ֆրիդրիխ Մերցը, Ադրբեջանի նախագահ Իլհամ Ալիևի հետ անցկացված համատեղ մամուլի ասուլիսի ընթացքում, անդրադարձել է տարածաշրջանային զարգացումներին։

«Շնորհավորում եմ Ադրբեջանին և Հայաստանին 2025 թվականի օգոստոսին Վաշինգտոնում համաձայնագրի ստորագրման կապակցությամբ։ Խաղաղությունը, անվտանգությունը և կայունությունն անհրաժեշտ են նաև Հարավային Կովկասին։ Գերմանիան և Եվրոպական միությունը խիստ շահագրգռված են այս աշխարհաքաղաքական առումով կարևոր տարածաշրջանում կայունությամբ»,- նշել է Մերցը։

Գերմանիայի կառավարության ղեկավարի փոխանցմամբ՝ Երևանի և Բաքվի միջև ձեռք բերված պայմանավորվածությունները հեռանկարներ են ստեղծում երկկողմ հարաբերությունները կարգավորելու և տասնամյակներ ձգվող հակամարտությանը վերջ դնելու համար։

«Տարածաշրջանում կայունությունը նաև նոր հնարավորություններ է բացում մեր երկրների միջև տնտեսական համագործակցության ընդլայնման համար», - ընդգծել է Գերմանիայի կանցլերը։