Մի խումբ աղջիկներ դաժան ծեծի էին ենթարկել մեկ այլ աղջկա․ ՔԿ-ն մանրամասնում է

Ավելի վաղ հայտնել էինք, որ համացանցում տարածվել էր տեսանյութ, որտեղ երևում էր, թե ինչպես են մի խումբ աղջիկներ ծեծի ենթարկում մեկ այլ աղջկա։ Տեսանյութից պարզ չէր, թե ինչն էր եղել վիճաբանության պատճառը։

Auroranews.am-ը կապ է հաստատել ՀՀ Քննչական կոմիտեի հետ՝ դեպքի վերաբերյալ պարզաբանում ստանալու նպատակով։

«Ֆիզիկական ներգործության դեպքի առթիվ կա նախաձեռնված քրեական վարույթ, նշանակվել է դատաբժշակական փորձաքննություն»,- հայտնեցին գերատեսչությունից։

Auroranews.am-ը կապ էր հաստատել նաև Ներքին գործերի նախարարության հետ։

ՆԳՆ-ից մեզ տեղեկացրին, որ դեպքը տեղի է ունեցել դեռևս հունիսին։

«Նշված դեպքը եղել է հունիսին։ Նույն օրը ՆԳՆ ոստիկանության ծառայողները հայտնաբերել են բոլոր մասնակիցներին և հաղորդման հետ միասին ներկայացրել Քննչական կոմիտե»,– հայտնել էին նախարարությունից։