ԵՄ-ում մտահոգված են արագ ընդլայնման հնարավոր ռիսկերով

Եվրամիության մի շարք երկրներ դեմ են կառույցի արագ ընդլայնմանը՝ մտավախություն ունենալով, որ նոր անդամների ընդունումը կարող է «տրոյական ձի» դառնալ ԵՄ-ի համար։ Այս մասին հայտնում է Politico-ն՝ հղում անելով եվրոպացի պաշտոնյաներին։

Պարբերականի տվյալներով՝ չնայած ԵՄ ընդլայնմանը հրապարակային աջակցությանը՝ Ֆրանսիան, Գերմանիան և Նիդեռլանդները դեմ են նոր անդամների արագ ընդունմանը։ Մտահոգությունն այն է, որ նոր անդամ երկրներում իշխանափոխությունից հետո այդ պետությունները կարող են խոչընդոտել կամ արգելափակել ԵՄ-ի առանցքային որոշումները։

Politico-ի զրուցակից դիվանագետներից մեկը նշել է, որ ընդլայնման գործընթացի երկարատև լինելը պայմանավորված է ապագա անդամների պատրաստվածությունը մանրամասն ստուգելու անհրաժեշտությամբ։

Միաժամանակ Եվրահանձնաժողովը նոր անդամների համար մշակում է թարմացված կանոններ, որոնք նախատեսվում է ԵՄ առաջնորդներին ներկայացնել հոկտեմբերի 15-ին՝ Եվրոպական խորհրդի նիստում։ Դրանք պետք է նվազեցնեն ընդլայնումից հետո որոշումների ընդունման և ռեսուրսների բաշխման հետ կապված ռիսկերը։

Նշվում է նաև, որ Հունգարիան դեռ չի հաստատել Ուկրաինայի և Մոլդովայի անդամակցության շուրջ բանակցային բոլոր կլաստերների բացումը։

ԵՄ-ն վերջին 13 տարիներին նոր անդամ չի ընդունել։ Վերջին շրջանում կառույցի ներսում ակտիվացել են քննարկումները, թե որքանով է Եվրամիությունը պատրաստ նոր երկրների ընդունմանը և ինչ փոփոխություններ են անհրաժեշտ ընդլայնման գործընթացում։