Չեռնոգորիան մեղադրել է Սերբիային Ռուսաստանի և Ուկրաինայի հարցում երկակի չափանիշների մեջ

Չեռնոգորիայի վարչապետ Միլոյկո Սպայիչը Սերբիայի նախագահ Ալեքսանդր Վուչիչին մեղադրել է երկակի չափանիշներ կիրառելու մեջ՝ մատնանշելով Բելգրադի հրապարակային հայտարարությունները Ռուսաստանի վերաբերյալ և սերբական զենքի ու զինամթերքի՝ Ուկրաինա հասնելու մասին տեղեկությունները։

«Ինչպե՞ս է ստացվում, որ Սերբիան, ըստ առկա տվյալների, Ուկրաինայի համար զենքի և զինամթերքի զգալի աղբյուրներից մեկն է՝ միաժամանակ մի ուղերձ հղելով Մոսկվային, իսկ մեկ ուրիշը՝ Եվրոպային»,- հայտարարել է Սպայիչը։

Նա Վուչիչին նաև անվանել է «Ռուսաստանի փիարով զբաղվող անձ»։

Չեռնոգորիայի վարչապետը շեշտել է, որ Պոդգորիցան չի ցանկանում հակամարտություն Սերբիայի հետ և կողմ է բարիդրացիական հարաբերություններին, սակայն ցանկանում է նաև հստակ եվրոպական քաղաքականություն։

Սպայիչի հայտարարությանը նախորդել էր Վուչիչի քննադատությունը Չեռնոգորիայի իշխանությունների հասցեին։ Սերբիայի նախագահը նրանց մեղադրել էր երկու երկրների հարաբերությունները հնարավորինս վատթարացնելու և «սերբերին վերադաստիարակելու» ձգտման մեջ։ Նա նաև քննադատել էր Պոդգորիցային Ռուսաստանի դեմ ԵՄ պատժամիջոցներին հետևողականորեն միանալու համար։

Սերբիան պաշտոնապես պնդում է, որ ուղղակիորեն զենք չի մատակարարում հակամարտող կողմերին։ Միաժամանակ Վուչիչը դեռ 2024-ին ընդունել էր, որ երրորդ երկրների միջոցով Ուկրաինա կարող էր հասնել շուրջ 800 մլն եվրոյի սերբական արտադրության զինամթերք։