Չենք կարող ընդունել Սահմանադրություն, որը թելադրվում է Ադրբեջանից․ Նարեկ Կարապետյան

Ուժեղ Հայաստան խմբակցության ղեկավար Նարեկ Կարապետյանը հայտարարել է, որ իրենց ուժը չի աջակցի այնպիսի սահմանադրական փոփոխությունների, որոնք, իրենց գնահատմամբ, պայմանավորված են Ադրբեջանի պահանջներով։

Անդրադառնալով հարցին, թե արդյոք ընդդիմությունը կարող է աջակցել նոր Սահմանադրության նախագծին, նա նշել է, որ Անկախության հռչակագիրը Հայաստանի «ծննդականն» է և այն չի կարելի անտեսել։

«Մեր անկախության հռչակագիրը մեր երկրի ծննդականն է։ Մենք խաղաղության ջատագովն ենք և դա բազմիցս ասել ենք։ Բայց մենք համաձայն չենք այն մոտեցմանը, որ պետք է մեր ծննդականը վառենք և ընդունենք այնպիսի Սահմանադրություն, որի մասին Ադրբեջանից շարունակ հայտարարություններ են հնչում»,- ասել է նա։

Կարապետյանի խոսքով՝ ադրբեջանական պաշտոնյաների հայտարարությունները սահմանադրական հանրաքվեի հնարավորության վերաբերյալ իրենց համար մտահոգիչ են։

«Մենք չենք կարող ընդունել Սահմանադրություն, որի մասին իրենք են ասում, որ սպասում են դրա ընդունմանը։ Դա վերաբերում է մեր երկրի ապագային»,- նշել է նա։

Պատգամավորը նաև ընդգծել է, որ իրենց քաղաքական ուժը շարունակելու է աշխատել խաղաղության հաստատման ուղղությամբ, սակայն այնպիսի ճանապարհով, որը, իրենց համոզմամբ, չի ստորադասի Հայաստանի և հայ ժողովրդի շահերը։

«Մենք աշխատելու ենք խաղաղության կայացման համար, բայց առաջարկելու ենք տարբերակներ, որոնք չեն ստորադասի մեր երկրի և մեր ազգի շահը»,- ասել է Կարապետյանը։

Նրա խոսքով՝ համապատասխան փուլում իրենք հանրությանը մանրամասն կներկայացնեն իրենց մոտեցումները և կբացատրեն, թե ինչպես են պատկերացնում խաղաղության հասնելու ճանապարհը։