Ռուսաստանը ենթարկվել է զանգվածային դրոնային հարձակման․ խոցվել է 456 անօդաչու

Ռուսաստանի մի շարք շրջաններ  գիշերվա ընթացքում զանգվածային դրոնային հարձակման են ենթարկնել։ Ռուսական կողմի տվյալներով՝ հարյուրավոր անօդաչուներ են արձակվել տարբեր ուղղություններով։

Թաթարստանի Նիժնեկամսկ քաղաքում բնակիչները պայթյունների ձայների և քաղաքի վրա բարձրացող ծխի մասին տեսանյութեր են հրապարակել։ Ուկրաինական մոնիթորինգային նախագծերը հայտնում են, որ հարձակում է եղել նաև տեղի նավթավերամշակման համալիրի վրա:

Ռոստովի մարզի ղեկավար Յուրի Սլյուսարը հայտնել է, որ գիշերվա ընթացքում տարածաշրջանի երկնքում ոչնչացվել է ավելի քան 70 անօդաչու։

Մոսկվայի ուղղությամբ, քաղաքապետ Սերգեյ Սոբյանինի տվյալներով, արձակվել է առնվազն 18 դրոն։ Եվս 16 անօդաչու խոցելու մասին հայտնել է Կալուգայի մարզի ղեկավար Վլադիսլավ Շապշան։

Դրոնների մասին են հայտնել նաև Սևաստոպոլում։ Տարածաշրջանի ղեկավար Միխայիլ Ռազվոժաևի խոսքով՝ գրանցվել է 15 անօդաչու։ Դրանցից մեկի հարվածից Ինժիր լողափի մոտ անտառ է հրդեհվել, և տարածքում գտնվող մարդկանց տարհանում են։

Դրոնային հարձակման մասին են հայտնել նաև Չուվաշիայի իշխանությունները։ Տարածաշրջանի ղեկավարի խոսքով՝ այնտեղ մեկ անօդաչու է խոցվել։

ՌԴ պաշտպանության նախարարության տվյալներով՝ ընդհանուր առմամբ գիշերվա ընթացքում հակաօդային պաշտպանության ուժերը խոցել են 456 ուկրաինական անօդաչու թռչող սարք։