Ազգային ժողովը քննարկում է Արամ Վարդևանյանի թեկնածությունն ԱԺ նախագահի տեղակալի պաշտոնում

Հայաստանի Հանրապետության Ազգային ժողովը քննարկում է «Ուժեղ Հայաստան» խմբակցության պատգամավոր Արամ Վարդևանյանի թեկնածությունը խորհրդարանի նախագահի տեղակալի պաշտոնում։

Թեկնածուի կենսագրությունն ու աշխատանքային գործունեությունն Ազգային ժողովի իններորդ գումարման առաջին նստաշրջանում ներկայացրել է «Ուժեղ Հայաստան» խմբակցության քարտուղար Տիգրան Աբրահամյանը։

Արամ Վարդևանյանի թեկնածությունն առաջադրել է «Ուժեղ Հայաստան» խմբակցությունը։ Խմբակցության ղեկավար Նարեկ Կարապետյանն օգոստոսի 2-ին հայտնել էր, որ թեկնածուի ընտրության ժամանակ հաշվի են առել նրա մասնագիտական փորձն ու պրոֆեսիոնալիզմը։

ՀՀ Սահմանադրության համաձայն՝ Ազգային ժողովն ունի երեք փոխնախագահ, որոնցից մեկը պետք է ընտրվի ընդդիմադիր խմբակցությունների կազմում ընդգրկված պատգամավորներից։ ԱԺ նախագահի տեղակալն ընտրվում է գաղտնի քվեարկությամբ՝ պատգամավորների ընդհանուր թվի ձայների մեծամասնությամբ։

Իններորդ գումարման Ազգային ժողովն ունի 105 պատգամավոր, հետևաբար Վարդևանյանի ընտրվելու համար անհրաժեշտ է առնվազն 53 կողմ ձայն։

Արամ Վարդևանյանը ծնվել է 1989 թվականի նոյեմբերի 1-ին Երևանում։ Ավարտել է Հայ-ռուսական համալսարանի իրավագիտության ֆակուլտետը, իրավաբանական գիտությունների թեկնածու է։

Նա մասնագիտական գործունեության ընթացքում աշխատել է իրավաբանական և ակադեմիական ոլորտներում։ 2016 թվականին զբաղեցրել է ՀՀ վարչապետի օգնականի պաշտոնը՝ համակարգելով մարդու իրավունքների, դատական համակարգի, քրեակատարողական հիմնարկների և հարակից ոլորտների հարցերը։

Վարդևանյանը եղել է նաև ութերորդ գումարման Ազգային ժողովի պատգամավոր։ Նրա պատգամավորական լիազորությունները դադարել էին 2022 թվականի դեկտեմբերի 2-ին։

Նա 2021 թվականի խորհրդարանական ընտրությունների ժամանակ եղել է «Հայաստան» դաշինքի պաշտոնական ներկայացուցիչը, իսկ 2026 թվականի ընտրությունների արդյունքներով պատգամավոր է ընտրվել «Ուժեղ Հայաստան» դաշինքի ցուցակով։

Հիշեցնենք, որ Ազգային ժողովի նախագահի տեղակալների պաշտոններում արդեն իսկ ընտրվել են իշխող «Քաղաքացիական պայմանագիր» խմբակցության ներկայացուցիչներ Վահագն Ալեքսանյանն ու Հայկ Կոնջորյանը։