ԵՄ-ն Ուկրաինային կհատկացնի 1,4 միլիարդ եվրո՝ ռուսական սառեցված ակտիվների եկամուտներից

Եվրամիությունը Ուկրաինային կտրամադրի 1,4 միլիարդ եվրո, որը ստացվել է Ռուսաստանի սառեցված պետական ակտիվների տոկոսներից։ Այս մասին հայտարարել է Եվրահանձնաժողովը։

Եվրահանձնաժողովի նախագահ Ուրսուլա ֆոն դեր Լայենի խոսքով՝ այդ միջոցները կուղղվեն Ուկրաինայի շարունակական դիմադրությանն աջակցելուն։

«Ռուսաստանը պետք է վճարի իր պատճառած ավերածությունների համար։ Մենք օգտագործում ենք ռուսական սառեցված ակտիվներից ստացված եկամուտը՝ դա ապահովելու համար։ Այդ միջոցներից ևս 1,4 միլիարդ եվրո ենք հատկացնում Ուկրաինային, ինչը կաջակցի Ռուսաստանի ապօրինի պատերազմի դեմ երկրի շարունակական դիմադրությանը»,- գրել է ֆոն դեր Լայենը X սոցիալական ցանցում։

Եվրահանձնաժողովի տվյալներով՝ օգոստոսի 3-ին ԵՄ բյուջե փոխանցված գումարը ձևավորվել է Եվրոպայում սառեցված Ռուսաստանի Կենտրոնական բանկի ակտիվների դրամական մնացորդների վրա կուտակված տոկոսներից: