ՏԵՍԱՆՅՈՒԹ.Սա արդեն հարցեր է առաջացնում․ Աննա Գրիգորյանը՝ Ռուբինյանի եղբոր պաշտոնների մասին

Ազգային ժողովում Աննա Գրիգորյանն անդրադարձել է Ռուբեն Ռուբինյանի հարցին և ներկայացրել նրա եղբոր՝ Լևոն Ռուբինյանի պաշտոնեական նշանակումների հետ կապված մանրամասները:

Աննա Գրիգորյանը, օգտվելով առիթից, շարունակել է իր գործընկեր Մեսրոպ Մանուկյանի բարձրացրած հարցադրումները, որոնք վերաբերում են Ռուբեն Ռուբինյանի եղբորը: 

Նա նշել է, որ Ռուբեն Ռուբինյանի եղբայրը, ում ինքը չի ճանաչում և ենթադրում է, որ լավ մասնագետ է, նշանակվել է «Ամիո Բանկի» վարչության նախագահի առաջին տեղակալ, բիզնեսի զարգացման գլխավոր տնօրեն: Գրիգորյանի խոսքով՝ խնդիրն այն է, որ այդ բանկի 25 %-ը պատկանում է կառավարությանը, և Ռուբեն Ռուբինյանի եղբայրը բարձրաստիճան պաշտոնի է նշանակվել հենց այն բանից հետո, երբ կառավարությունը ձեռք է բերել այդ մասնաբաժինը: 

Բացի այդ, Ռուբեն Ռուբինյանի եղբայրը՝ Լևոն Ռուբինյանը, հանդիսանում է «Վիվա Արմենիայի» կառավարման մարմնի անդամ: Այստեղ ևս, ըստ պատգամավորի, ամբողջ խնդիրն այն է, որ կառավարությունն ունի 20 % մասնաբաժին, և «Վիվասել-ՄՏՍ»-ի վաճառքից ու «Վիվա Արմենիա» դառնալուց հետո, երբ կառավարությունը ձեռք է բերել 20 %-ը, դրանից հետո է Լևոն Ռուբինյանը նշանակվել այդ պաշտոնում: