«Ուզում եք ՀՀ քաղաքացիություն՝ եկեք այստեղ ապրեք»․ Փաշինյանը՝ արտերկրի հայերին

ՀՀ վարչապետ Նիկոլ Փաշինյանը հայտարարել է, որ պետք է դադարեցնել Հայաստանում չբնակվող հայերին ՀՀ քաղաքացիություն շնորհելու գործող պրակտիկան։

ԱԺ-ում կառավարության 2026-2031 թվականների ծրագիրը ներկայացնելիս Փաշինյանը նշել է, որ Սահմանադրությամբ հայերը պարզեցված կարգով քաղաքացիություն ստանալու իրավունք ունեն Հայաստան բնակության տեղափոխվելու պահից։

Նրա խոսքով՝ այսօր կան դեպքեր, երբ արտերկրում մշտապես բնակվող հայերը ՀՀ քաղաքացիություն են ստանում՝ առանց Հայաստան տեղափոխվելու, իսկ նրանց անձնագրերն ուղարկվում են բնակության երկիր։

«Մենք, կներեք արտահայտությանս համար, աջ ու ձախ քաղաքացիություն ենք բաժանում։ Միգուցե նախկինում դա արվում էր այն պատճառով, որ մեր երկրի քաղաքացիությունը բարձր վարկանիշ չուներ, բայց այսօր այն բարձրանում է։ Եվ բացի այդ, պետք է մեր իրավական պրակտիկան համապատասխանեցնել Սահմանադրությանը»,- հայտարարել է Փաշինյանը։

Վարչապետի խոսքով՝ եթե արտերկրում բնակվող հայերը ցանկանում են ՀՀ քաղաքացիություն ստանալ, պետք է գան և բնակվեն Հայաստանում։