Լոռու մարզում սպանություն չի արձանագրվել․ ՆԳ նախարարն ամփոփել է կիսամյակի արդյունքները

ՆԳ նախարար Արփինե Սարգսյանը Լոռու մարզ կատարած այցի ընթացքում ամփոփել է ոստիկանության 2026 թվականի առաջին կիսամյակի աշխատանքների արդյունքները։ Հանդիպմանը մասնակցել են ՆԳ նախարարության և Ոստիկանության ղեկավար կազմի ներկայացուցիչները։

Քրեական ոստիկանության Լոռու մարզային վարչության տվյալներով՝ հաշվետու ժամանակահատվածում գրանցվել է 334 հանցագործություն։ Սպանության դեպք չի արձանագրվել, սակայն բացահայտվել է սպանության փորձի և նախապատրաստության 5 դեպք։ Բացի այդ, վնասազերծվել են հանցավոր կազմակերպություն և խմբավորումներ։

Ներկայացված տվյալների համաձայն՝ աճել են հասարակական անվտանգության, հասարակական կարգի և բնակչության առողջության դեմ ուղղված հանցագործությունները, ինչը հիմնականում պայմանավորված է առանց վարորդական իրավունքի մեքենա վարելու դեպքերի ավելի ակտիվ բացահայտմամբ։

Զեկույցներով հանդես են եկել նաև Համայնքային ոստիկանության մարզային ստորաբաժանումների, Պարեկային ծառայության, ինչպես նաև Ոստիկանության գվարդիայի Վանաձորի և Թումանյանի պետական պահպանության բաժինների ղեկավարները՝ ներկայացնելով իրենց ստորաբաժանումների աշխատանքի արդյունքները։

Համայնքային ոստիկանության տարբեր բաժիններում արձանագրվել են ինչպես հանցագործությունների նվազման, այնպես էլ աճի միտումներ։ Որոշ բաժիններում նվազել են մարդու և սեփականության դեմ ուղղված հանցագործությունները, մինչդեռ աճել են ընտանեկան բռնության, թմրամիջոցների ապօրինի շրջանառության և տնտեսական բնույթի իրավախախտումների դեպքերը։

Լոռու մարզի պարեկային ծառայության աշխատակիցները տարվա առաջին կեսին կազմել են 45 274 վարչական արձանագրություն, ինչը 3994-ով ավելի է նախորդ տարվա նույն ժամանակահատվածի համեմատ։ Բացահայտվել է 88 հանցագործություն։ Չնայած ճանապարհատրանսպորտային պատահարների թվի աճին՝ դրանց հետևանքով զոհերի թիվը նվազել է։

Ամփոփելով արդյունքները՝ Արփինե Սարգսյանը դրական է գնահատել Լոռու մարզում հանցավորության դեմ պայքարի արդյունավետությունը և հանձնարարել շարունակել աշխատանքները հանցավոր խմբերի բացահայտման, ապօրինի զենքի և թմրամիջոցների շրջանառության դեմ պայքարի, ինչպես նաև սեփականության դեմ ուղղված հանցագործությունների կանխարգելման ուղղությամբ։ Նախարարն առանձնահատուկ ուշադրություն է հրավիրել նաև անչափահասների նկատմամբ հանցագործությունների, ընտանեկան բռնության, սեռական անձեռնմխելիության դեմ ուղղված հանցագործությունների վերաբերյալ ահազանգերին արագ արձագանքելու անհրաժեշտության վրա։