«Չդրոշմավորված» գարեջուր Հայաստանում․ «Կիլիկիա»-յի պարզաբանումը․ Հետք

«Հետքը» գրում է, որ շուկայում հայտնաբերվել են «Կիլիկիա» գարեջրի շշեր, որոնց թվային դրոշմապիտակները (Data Matrix կոդեր) E-Mark հավելվածով սքանավորելիս համակարգը ցույց է տալիս, որ ապրանքը դրոշմավորված չէ։ Սա հարցեր է առաջացրել՝ արդյոք շուկայում կարող են լինել չհարկվող կամ ստվերային ապրանքներ, թե խնդիրը տեխնիկական բնույթի է։

«Երևանի գարեջուր» ՓԲԸ-ից, որը շահագործում է «Կիլիկիա» գարեջրի գործարանը, «Հետքի» հարցմանն ի պատասխան հայտնել են, որ կոդերի չընթերցվելը կապված է բացառապես տեխնիկական կամ ֆիզիկական վնասվածքների հետ՝ օրինակ՝ խոնավության, տեղափոխման ընթացքում առաջացած քերծվածքների կամ փաթեթավորման ժամանակ առաջացած խնդիրների։

Գործարանը պնդում է, որ Data Matrix կոդերը գեներացվում են ավտոմատացված համակարգով, և տնտեսվարողը չունի հնարավորություն դրանք փոխելու, խմբագրելու կամ կրկնօրինակելու։

«Հետքը» գրում է, որ այս հարցում կողմերի դիրքորոշումները հակասում են միմյանց։ «Կիլիկիա»-ն պնդում է, որ խնդիրը տեխնիկական է, մինչդեռ «Ի-Մարկ»-ը նշում է, որ սքանավորվող, բայց համակարգում չճանաչվող կոդերի դեպքում անհրաժեշտ է պարզել պատճառները։

Միաժամանակ, թվային դրոշմապիտակներ տրամադրող «Ի-Մարկ» ընկերությունից «Հետքին» հայտնել են, որ եթե կոդը հնարավոր է սքանավորել, ապա դրա մասին տեղեկատվությունը պետք է արտացոլվի համակարգում։ Ընկերությունը նշել է նաև, որ Data Matrix ձևաչափում առկա տեղեկատվության սիմվոլները տեխնիկապես հնարավոր է փոփոխել և կրկին արտատպել, սակայն դա չի փոխում թվային դրոշմավորման համակարգում պահպանվող տվյալները։

Հարցերի պատասխանների համար «Հետքը» դիմել է նաև Պետական եկամուտների կոմիտե, սակայն հրապարակման պահին արձագանք չի ստացել։