Լրագրողական կազմակերպությունները պահանջում են անհապաղ կասեցնել ԱԺ-ի նոր սահմանափակումները

Հայաստանի լրագրողական կազմակերպությունները պահանջում են կասեցնել Ազգային ժողովի նստավայրում լրագրողների գործունեությանը վերաբերող նոր սահմանափակումների կիրառումը և նախաձեռնել դրանց շուրջ բաց քննարկումներ։ Այս մասին նշվում է նրանց տարածած հայտարարությունում։

Նորընտիր 9-րդ գումարման Ազգային ժողովի աշխատանքների մեկնարկից առաջ ԱԺ նախագահի պարտականությունները ժամանակավորապես կատարող Ռուբեն Ռուբինյանը ստորագրել է «ԱԺ նստավայրի տարածքում և շենքում գործող անվտանգության կանոնները հաստատելու մասին» որոշումը, որը վերաբերում է նաև լրատվամիջոցների ներկայացուցիչների աշխատանքին։

Հայտարարության հեղինակների համոզմամբ՝ որոշման մի շարք դրույթներ հակասում են ՀՀ Սահմանադրությամբ, «Զանգվածային լրատվության մասին» օրենքով և միջազգային փաստաթղթերով ամրագրված խոսքի ազատության ու ԶԼՄ-ների գործունեության երաշխիքներին։

Նրանք նշում են, որ նոր կանոնները ոչ միայն պահպանում, այլև խստացնում են 2019 թվականին ընդունված և 2021-ին փոփոխված սահմանափակումները, որոնք վերաբերում են խորհրդարանում լրագրողների տեղաշարժին և աշխատանքին։

«Դրանց հիման վրա ԱԺ-ում լրագրողների տեղաշարժի և գործունեություն ծավալելու առումով այնպիսի արգելքներ կիրառվեցին, որոնք աննախադեպ էին հայաստանյան խորհրդարանի ողջ պատմության մեջ»,- նշում են լրագրողական ՀԿ-ները։ Նրանք շեշտում են, որ ո՛չ այն ժամանակ, ո՛չ էլ այժմ այդ որոշումները չեն քննարկվել լրատվամիջոցների և լրագրողական հասարակական կազմակերպությունների հետ։

Կազմակերպությունները հատկապես խնդրահարույց են համարում այն դրույթը, ըստ որի՝ հավատարմագրված լրագրողները հանձնաժողովների նիստերին կարող են մասնակցել միայն հանձնաժողովի նախագահի թույլտվությամբ, իսկ նրանց ցուցակը պետք է նիստից առնվազն երկու ժամ առաջ ներկայացվի ԱԺ գլխավոր քարտուղարին։ Նրանց կարծիքով՝ դա հնարավորություն է տալիս կամայական որոշումների։

Քննադատության է արժանացել նաև այն պահանջը, որով ԱԺ դռնբաց նիստերի ժամանակ մամուլի օթյակ մուտք գործելու համար հավատարմագրված լրագրողները պետք է ներառված լինեն գլխավոր քարտուղարի հաստատած առանձին ցուցակում։

Անընդունելի է համարվում նաև Պետական պահպանության ծառայության աշխատակիցներին ծառայողական պարտականությունները կատարելիս տեսաձայնագրելու կամ լուսանկարելու արգելքը, որը, ըստ հայտարարության հեղինակների, նախկինում ևս քննադատվել էր Տեղեկատվական վեճերի խորհրդի կողմից։

Լրագրողական կազմակերպությունները 9-րդ գումարման Ազգային ժողովի ղեկավարությունից պահանջում են կասեցնել լրատվամիջոցներին վերաբերող դրույթների գործողությունը և կազմակերպել բաց քննարկումներ՝ փոխադարձ ընդունելի լուծումներ գտնելու համար։

Հայտարարությունը ստորագրել են Խոսքի ազատության պաշտպանության կոմիտեն, Երևանի մամուլի ակումբը, Մեդիա նախաձեռնությունների կենտրոնը, Բազմակողմանի տեղեկատվության ինստիտուտ-Հայաստանը, լրագրողների «Ասպարեզ» ակումբը, Հանրային լրագրության ակումբը, «Լրագրողներ հանուն ապագայի» և «Լրագրողներ հանուն մարդու իրավունքների» ՀԿ-ները։