Ինֆանտինոյի պաշտոնավարումը վտանգված է․ ՈՒԵՖԱ-ն նախագահի նոր թեկնածու է փնտրում. Politico

ՈՒԵՖԱ-ն ցանկանում է Ջաննի Ինֆանտինոյին հեռացնել ՖԻՖԱ-ի նախագահի պաշտոնից և նրա փոխարինող է փնտրում՝ ըստ Politico-ի։

Շվեյցարացի Ջաննի Ինֆանտինոն ղեկավարում է ՖԻՖԱ-ն 2016 թվականից։ Հաջորդ տարի նա կարող է վերընտրվել նոր ժամկետով։ Սակայն, ըստ պարբերականի, եվրոպական ֆուտբոլային պաշտոնյաները ցանկանում են մարտահրավեր նետել նրան և որպես ՖԻՖԱ-ի նախագահի պաշտոնի հավանական թեկնածու դիտարկում են կատարցի սպորտային գործիչ, ֆրանսիական «Պարի Սեն Ժերմեն» ֆուտբոլային ակումբի նախագահ Նասեր ալ-Խելաիֆիին։

Պարբերականը ալ-Խելաիֆիին անվանում է «եվրոպական ֆուտբոլի ամենաազդեցիկ գործարարը»։ Նա 52 տարեկան է։ Բացի ՊՍԺ-ից, նա նաև ղեկավարում է Եվրոպական ակումբների ասոցիացիան և հանդիսանում է beIN խոշոր մեդիա խմբի նախագահը։

Ալ-Խելաիֆիի ներկայացուցիչը հայտարարել է, որ նա «բացարձակապես որևէ հավակնություն, մտադրություն կամ հետաքրքրություն չունի ՖԻՖԱ-ում որևէ պաշտոն զբաղեցնելու նկատմամբ»։

Պարբերականի աղբյուրների փոխանցմամբ՝ ալ-Խելաիֆիի թեկնածությունը կարող է աջակցություն ստանալ եվրոպացիների շրջանում, գլխավոր խնդիրը նրան համոզելն է։