ՏԵՍԱՆՅՈՒԹ. Հայկական գյուղմթերքն արտահանվել է ավելի քան 25 երկիր․ Պապոյանը վստահեցնում է՝ բերքը դաշտերում չի մնա

Հայկական միրգը, պտուղն ու բանջարեղենը տարբեր ծրագրերի շրջանակում արտահանվել են ավելի քան 25 երկիր։ Այս մասին լրագրողների հետ զրույցում հայտարարել է էկոնոմիկայի նախարար Գևորգ Պապոյանը։

Անդրադառնալով Ֆրանսիայի հայկական խանութներում ծիրանի վաճառքին և արտահանման սահմանափակ ծավալների վերաբերյալ դիտարկումներին՝ նախարարը պնդել է, որ կառավարությունը գյուղմթերքի իրացման հարցը մեծ հաշվով լուծել է։

«Մամուլում գրում էին, թե որքան ծիրան է մնալու ու թափվելու գետնին։ Մեկ կիլոգրամ ծիրան գետնին չի թափվել։ Լոլիկը նույնպես չի մնացել դաշտերում․ այն մթերվում, վաճառվում և արտահանվում է»,- ասել է Պապոյանը։

Նրա խոսքով՝ կառավարությունը վեց ամսով սահմանափակում է կիրառել Հայաստան ներմուծվող տոմատի մածուկի նկատմամբ։ Դրանից հետո հայկական չորս գործարան նախարարությանը տեղեկացրել է, որ պատրաստ է մթերել դաշտային և ջերմոցային լոլիկի ամբողջ՝ մթերման ենթակա ծավալը։

«Մեր գյուղացիներին ուզում եմ ասել՝ այս տարի ևս մեկ կիլոգրամ լոլիկ դաշտում չի մնա։ Բացի այդ, տոմատի և տոմատի հյութերի արտահանման դեպքում կառավարությունն աջակցություն կտրամադրի արտահանողներին»,- հայտարարել է նախարարը։

Ռուսաստանին՝ հայկական լոլիկի ներմուծման սահմանափակումները վերացնելու խնդրանքի վերաբերյալ Պապոյանը նշել է, որ Հայաստանը շահագրգռված է ԵԱՏՄ-ի բնականոն գործունեությամբ։

«Մենք չենք ուզում, որ ԵԱՏՄ-ն փլուզվի։ Ուզում ենք, որ այն մնա և կառուցվի, որովհետև ԵԱՏՄ-ն մեր կազմակերպությունն է»,- ասել է նա։

Անդրադառնալով էլեկտրական մեքենաների ներկրման քվոտաներին՝ նախարարը հայտնել է, որ օգոստոսի 1-ի դրությամբ 15 հազար ավտոմեքենայի համար նախատեսված քվոտան դեռ սպառված չի լինի։ Մնացած քանակի վերաբերյալ տվյալները կհրապարակվեն օգոստոսի առաջին շաբաթվա ընթացքում։

Պապոյանը նշել է, որ կառավարությունն արդեն աշխատում է հաջորդ տարվա քվոտան ապահովելու ուղղությամբ, սակայն վերջնական արդյունք չի կարող երաշխավորել, քանի որ ԵԱՏՄ-ում որոշումն ընդունվում է կոնսենսուսով։

Նախարարը խոսել է նաև պետական կառավարման անցած «Արարատցեմենտ»-ի մասին։

«Այնտեղ շատ բան կա փոխելու, ոչ միայն գոմի դուռը։ Կառավարման որակը, ցավոք, կարծես գոմի կառավարման մակարդակի է եղել։ Պետք է այն դարձնենք ժամանակակից գործարան և փոխենք քրեաօլիգարխիկ մատակարարումների համակարգը։ Արդյունքները շուտով կտեսնեք»,- հայտարարել է Պապոյանը։

Նա պարզաբանել է նաև, որ գործարանի կառավարիչ նշանակված անձը՝ նախկինում վարչապետի օգնական աշխատած պարոն Գևորգյանը, նշանակումից առաջ աշխատանքի է անցել Էկոնոմիկայի նախարարությունում։