Հայ ըմբիշը կիսաեզրափակչում է աշխարհի Մ-17 առաջնությունում

Բաքվում մեկնարկած ազատ ոճի ըմբշամարտի աշխարհի մինչև 17 տարեկանների առաջնության առաջին մրցումային օրը պայքարի մեջ մտած Հայաստանի երեք ներկայացուցիչներից մեկը նվաճել է կիսաեզրափակիչի ուղեգիր: Դավիթ Բալեյանը (55 կգ) որակավորման փուլում 8:6 հաշվով առավելության է հասել լեհ Մացեյ Մրոժեկի նկատմամբ, իսկ 1/8 եզրափակիչում նրա մեքսիկացի մրցակիցը հրաժարվել է գոտեմարտից: 

Քառորդ եզրափակիչում հայ ըմբիշը 4:1 հաշվով պարտության է մատնել վրացի Սաբա Մինդիաշվիլիին և անցել կիսաեզրափակիչ: Էրիկ Պապիկյանը (65 կգ) որակավորման փուլում 9:1 հաշվով վստահ հաղթանակ է տարել ադրբեջանցի Ռաշիդ Նազարովի նկատմամբ, սակայն 1/8 եզրափակիչում 1:8 հաշվով զիջել է Ռուսաստանը ներկայացնող Մագոմեդ Իբրագիմովին և ավարտել պայքարը: Վահե Ասլանյանը (80 կգ) որակավորման փուլում 2:6 հաշվով պարտվել է ռուս Կանտեմիր Ելմեսովին ու դուրս մնացել հետագա մրցելույթներից: 

Ազատ ոճի ըմբշամարտի Հայաստանի Մ-17 հավաքականի կազմում մրցավայր մեկնած Մուրադ Ղարիբյանը (51 կգ), Գրիշա Գևորգյանը (60 կգ) և Վարուժան Ասլանյանը (71 կգ) պայքարի մեջ կմտնեն օգոստոսի 1-ին: Հունահռոմեական ոճի ըմբշամարտի Հայաստանի Մ-17 հավաքականն աշխարհի առաջնությանը մասնակցել էր 10 մարզիկով և նվաճել 1 ոսկե ու 2 բրոնզե մեդալ: Ջանես Նազարյանը (71 կգ) դարձել էր աշխարհի Մ-17 չեմպիոն, իսկ Արարատ Ավետիսյանը (48 կգ) և Գևորգ Հարությունյանը (51 կգ) արժանացել էին բրոնզե մեդալների: