Դատարանը մերժել է Ռոբերտ Քոչարյանի հայցն ընդդեմ Նիկոլ Փաշինյանի

Երևան քաղաքի առաջին ատյանի ընդհանուր իրավասության դատարանը մերժել է ՀՀ երկրորդ նախագահ Ռոբերտ Քոչարյանի հայցն ընդդեմ վարչապետ Նիկոլ Փաշինյանի՝ պատիվն ու արժանապատվությունը արատավորող տեղեկատվությունը հերքելու և փոխհատուցում վճարելու պահանջների վերաբերյալ։ Այս մասին հայտնել է AM իրավաբանական ընկերությունը։

Հայցը վերաբերում էր 2025 թվականի հունիսի 5-ին կառավարության նիստի ընթացքում Նիկոլ Փաշինյանի արած հայտարարությանը, որտեղ նա Ռոբերտ Քոչարյանի վերաբերյալ ասել էր.

«Մենք կոռեկտություններ պահելով սխալվում ենք․ օրինակ՝ մենք չենք արձանագրել պաշտոնապես, որ Ռոբերտ Քոչարյանը կաշառակեր ա, և դա արձանագրված ա դատարանի որոշմամբ, որովհետև մարդը գնացել ա իրա դեմ կաշառքի գործը ասել ա՝ վաղեմության ժամկետ կիրառեք․ դա տեղի ա ունենում էն ժամանակ, երբ որ ինքը խոստովանում ա, որ ինքը կաշառակեր ա»։

AM իրավաբանական ընկերության հաղորդմամբ՝ դատարանը 2026 թվականի հուլիսի 23-ի վճռով ամբողջությամբ մերժել է հայցը։

Ընկերության փոխանցմամբ՝ դատարանը համաձայնել է այն իրավական դիրքորոշմանը, որ վարչապետի օգտագործած «կաշառակեր» արտահայտությունը տվյալ գործի հանգամանքներից բխող, փաստական հիմք ունեցող գնահատողական դատողություն է։

Դատարանը, մասնավորապես, արձանագրել է, որ այդ արտահայտությունը հիմնված է քրեական գործով ընդունված դատական ակտի և հայցվորի վարքագծի վրա, ինչպես նաև համապատասխանում է ՀՀ Վճռաբեկ դատարանի և Մարդու իրավունքների եվրոպական դատարանի նախադեպերով ձևավորված մոտեցումներին։

Արդյունքում դատարանը եզրակացրել է, որ գործով բավարար ապացույցներ չկան՝ Քաղաքացիական օրենսգրքի 1087.1-րդ հոդվածով նախատեսված հիմքերի առկայությունը հաստատելու համար, ուստի Ռոբերտ Քոչարյանի ներկայացրած հայցը ենթակա է մերժման։