Այս խուզարկությունը միջամտություն է Նարեկ Կարապետյանի քաղաքական գործունեությանը. Վարդևանյան

Այսօր վաղ առավոտյան իրավապահները խուզարկություն են իրականացրել «Ուժեղ Հայաստան» կուսակցության խորհրդի անդամ, ԱԺ պատգամավոր Նարեկ Կարապետյանի տանը։ Լրագրողների հետ զրույցում փաստաբան և կուսակցության անդամ Արամ Վարդևանյանն ասաց, որ գործողությունն իրականացվել է բոլորին հայտնի քրեական վարույթի շրջանակներում, այն գնահատելով որպես քաղաքական գործունեությանը միջամտություն։

Վարդևանյանի խոսքով՝ խուզարկության անհրաժեշտությունն ու համաչափությունը հիմնավորված չեն եղել։ Նրա գնահատմամբ՝ նման ինտենսիվ վարույթային գործողության համար բավարար պատճառաբանություններ չեն ներկայացվել։

Փաստաբանն ընդգծեց, որ Նարեկ Կարապետյանն արդեն ունի Ազգային ժողովի պատգամավորի կարգավիճակ, և նման պայմաններում նրա նկատմամբ իրականացվող գործողությունները պետք է համապատասխանեին հիմնավորվածության առավել բարձր շեմի։

Վարդևանյանը նշեց՝ քանի որ խուզարկությունը գաղտնի վարույթային գործողություն է, այլ մանրամասներ հրապարակել չի կարող։

Նա տեղեկացրեց, որ փաստաբանական թիմը բողոքարկելու է խուզարկության վերաբերյալ որոշումը, իսկ արդյունքների մասին կհայտնեն ավելի ուշ։