Կառավարությունը Վեդիի ջրամբարին լրացուցիչ 650 մլն դրամ կհատկացնի

Վեդիի ջրամբարն ամբողջությամբ շահագործման կհանձնվի մինչև 2027 թվականի վերջը։ Այս մասին կառավարության նիստում հայտարարել է ՀՀ փոխվարչապետ Տիգրան Խաչատրյանը։

Նրա խոսքով՝ ջրամբարը նախատեսված է 30 մլն խորանարդ մետր ջրի համար, սակայն այս պահին լցված է 12,5 մլն խորանարդ մետրով։ Խաչատրյանը պարզաբանել է, որ այն ամբողջությամբ չի լցվում, քանի որ ոռոգման ակտիվ շրջանում ջուրն ուղղվում է գյուղատնտեսական նպատակներով օգտագործմանը։

Նա նշել է, որ 2027 թվականի ընթացքում նախատեսվում է ջրամբարի ջրալցման ծավալը հասցնել 20 մլն խորանարդ մետրի, իսկ մինչև նույն տարվա վերջ՝ ամբողջական 30 մլն խորանարդ մետրի։

Կառավարության նիստում Տարածքային կառավարման և ենթակառուցվածքների նախարար Դավիթ Խուդաթյանը հայտնել է, որ Վեդիի ջրամբարի ծրագրի համար լրացուցիչ 650 մլն դրամ կհատկացվի։ Նրա խոսքով՝ շուրջ 468 մլն դրամը կուղղվի կապալառուին՝ հետավարտական երաշխիքի շրջանակում, իսկ 117 մլն դրամը՝ խորհրդատուի ծառայությունների վճարմանը։

Խաչատրյանը նաև տեղեկացրել է, որ մեկնարկել է ևս երեք նոր ջրամբարների՝ Քասախի, Լիճքի և Ելփինի նախագծերի իրականացումը, իսկ դրանց շինարարությունը նախատեսվում է սկսել մինչև այս տարվա վերջ։ Նրա խոսքով՝ ֆինանսավորման վերաբերյալ արդեն պայմանավորվածություններ կան նաև Արթիկի և Աստղաձորի ջրամբարների համար, իսկ Մաստարայի ջրամբարի նախագիծն արդեն ավարտվել է։ Բացի այդ, նախագծային աշխատանքներ են իրականացվում ևս 12 ջրամբարի ուղղությամբ։