Դուրովին ներառել են ահաբեկիչների և ծայրահեղականների ցանկում

Telegram-ի հիմնադիր Պավել Դուրովը ներառվել է ՌԴ ֆինանսական մոնիթորինգի դաշնային ծառայության՝ «Ռոսֆինմոնիթորինգի» ահաբեկիչների և ծայրահեղականների ցանկում։

Համապատասխան գրառումը՝ 6895 համարով, հայտնվել է ռեեստրի «Ֆիզիկական անձինք» բաժնում։ Այն ունի հետևյալ տեսքը․ «ԴՈՒՐՈՎ ՊԱՎԵԼ ՎԱԼԵՐԵՎԻՉ*, ծնված՝ 10.10.1984 թ., ԼԵՆԻՆԳՐԱԴ ՔԱՂԱՔ»։

Ցանկում ներառվելը հանգեցնում է բանկային հաշիվների արգելափակման։ Դրանցից թույլատրվում է կանխիկացնել և ծախսել միայն սահմանափակ գումարներ։

Նախօրեին՝ հուլիսի 29-ին, ՌԴ Անվտանգության դաշնային ծառայությունը հայտարարել էր, որ Դուրովը ահաբեկչությանն աջակցելու գործով միջազգային հետախուզման մեջ է հայտարարվում։

Գերատեսչությունը որոշումը հիմնավորել էր նրանով, որ Telegram-ի ղեկավարությունը չի հեռացրել այն ալիքները, զրույցներն ու բոտերը, որոնք ուկրաինական հատուկ ծառայությունները, ինչպես նաև ահաբեկչական և ծայրահեղական կազմակերպություններն օգտագործում են «դիվերսիաներ, ահաբեկչություններ և զանգվածային սպանություններ իրականացնելու համար»։ ԱԴԾ-ն նաև նշել էր, որ մեսենջերն օգտագործվում է կիբեռխարդախների կողմից։

Փորձագետները «Ռադիո ՌԲԿ»-ի եթերում ընդգծել են, որ Դուրովին ներկայացված մեղադրանքը չի տարածվում Telegram-ի կամ մեսենջերի օգտատերերի վրա։

Իրավաբան Անդրեյ Ակսյոնովի խոսքով՝ օրենսդրությամբ հարթակի հիմնադրի դեմ հարուցված քրեական գործի և հենց հարթակի կարգավիճակի միջև ուղիղ կապ չկա։ Եթե պահանջները տարածվեն նաև ծառայության վրա, հնարավոր է երկու տարբերակ՝ այն կարող է ճանաչվել անցանկալի կամ ծայրահեղական կազմակերպություն։ Նույն տեսակետն է հայտնել նաև մեդիա իրավաբանների կոլեգիայի կառավարիչ գործընկեր Ֆյոդոր Կրավչենկոն։