Ռուսաստանցիների պահանջարկը Երևանի բնակարանների նկատմամբ կտրուկ աճել է

Հայաստանում ռուսաստանցիների կողմից բնակարանների նկատմամբ պահանջարկի կտրուկ աճ է գրանցվել, որը համեմատելի է 2022 թվականի ցուցանիշների հետ: Այդ մասին գրում է DW на русском :

Տեղական  անշարժ գույքի գործակալներից մեկի փոխանցմամբ՝ վերջին ամիսներին Երևանում բնակարանների վարձակալության գնային մակարդակը բարձրացել է շուրջ 30%-ով։ Նա դա պայմանավորել է «նոր ժամանող ռուսաստանցիների հոսքով»՝ նշելով նաև սեպտեմբերից մեկնարկող վարձակալության «բազմաթիվ հարցումների» մասին և ենթադրելով, որ ՌԴ քաղաքացիները ցանկանում են հեռանալ երկրից մինչև Պետդումայի ընտրությունները։

Մեկ այլ  անշարժ գույքի գործակալ ընդգծել է, որ պահանջարկը հսկայական է, ինչի պատճառով Երևանի անշարժ գույքի շուկայում ձևավորված իրավիճակի հետևանքով գները պարզապես ֆանտաստիկ են։

Զրուցակիցներից ևս մեկի համաձայն՝ Երևանում բնակարանի ընտրության հարցով դիմողների 80%-ը վերջերս տեղափոխված կամ տեղափոխվելու պատրաստվող անձինք են։

Ավելի վաղ՝ հուլիսին, Ուկրաինայի նախագահ Վլադիմիր Զելենսկին հայտարարել էր, որ ՌԴ իշխանությունները ծրագրում են 2026 թվականի աշնանը «ընդլայնել զորահավաքը»։ 

Զելենսկու խոսքով՝ ՌԴ նախագահ Վլադիմիր Պուտինը «պատրաստվում է նոր ռուսաստանցիների պարզապես տանել պատերազմ»։