ՀԷՑ-ի շուրջ նոր քայլ․ անցկացվել է կառավարության նախագծի հանրային լսումը

Տարածքային կառավարման և ենթակառուցվածքների նախարարությունում անցկացվել է «Հայաստանի էլեկտրական ցանցեր» ՓԲԸ-ի 100 % բաժնետոմսերի (բաժնեմասի) նկատմամբ հանրային գերակա շահ ճանաչելու մասին որոշման նախագծի հանրային լսումը։

ՀՀ ՏԿԵ նախարարությունից տեղեկացնում են, որ նախարար Դավիթ Խուդաթյանի գլխավորությամբ կայացած հանրային լսմանը ներկա են եղել «ՀԷՑ» ժամանակավոր կառավարիչ Ռոմանոս Պետրոսյանը, Հանրային ծառայությունները կարգավորող հանձնաժողովի անդամ Սերգեյ Աղինյանը, էներգետիկ համակարգի ընկերությունների ղեկավարներ ու ներկայացուցիչներ, քաղաքացիներ, ինչպես նաև ԶԼՄ ներկայացուցիչներ։

Նախագծի բովանդակությունը ներկայացնելիս նախարար Խուդաթյանն ընդգծել է, որ հանրային գերակա շահ ճանաչելու որոշման հիմքում ընկած է էլեկտրաէներգիայի բաշխման կենսական հանրային նշանակությունը, բնակչությանն անխափան էլեկտրամատակարարմամբ ապահովելը, սոցիալական ու ռազմավարական օբյեկտների բնականոն աշխատանքը, էներգետիկ համակարգի կայունությունն ու սպառողների իրավունքների պաշտպանությունը։

Մասնակիցների կողմից քննարկվող նախագծի վերաբերյալ դիտողություններ կամ առաջարկություններ չեն արվել։