Երևանում 41-ամյա տղամարդը «հուշանվեր» 20-հազարանոցներով միրգ է գնել ու ձերբակալվել

Երևանում 41-ամյա տղամարդը կեղծ՝ «հուշանվեր» գրառմամբ 20-հազարանոցներով միրգ է գնել և վաճառողներից ստացել իրական գումար՝ որպես մանր։ Դեպքը բացահայտել են ոստիկանները։

ՀՀ ՆԳՆ ոստիկանության տվյալներով՝ հուլիսի 24-ին նույնատիպ երկու հաղորդում է ստացվել, սակայն տեղեկությունը ՆԳՆ-ն հրապարակել է այսօր:

Դեպքերից մեկով Արագածոտնի մարզի Ոսկեհատ գյուղի բնակչուհին հայտնել է, որ Երևանի Շիրազի փողոցում անհայտ անձը իրենից 3000 դրամի միրգ է գնել և վճարել «հուշանվեր» գրառմամբ 20 հազար դրամանոց թղթադրամով՝ ստանալով 17 հազար դրամ մանր։

Նույն փողոցում մեկ այլ վաճառողից՝ Շենավան գյուղի բնակչուհուց, տղամարդը 1000 դրամ արժողությամբ միրգ է գնել և կրկին վճարել նույնատիպ թղթադրամով։

Ոստիկանության օպերատիվ միջոցառումների արդյունքում հայտնաբերվել և ձերբակալվել է 41-ամյա տղամարդը։ Նա ոստիկանությունում խոստովանել է արարքը։

Դեպքի առթիվ կազմված փաստաթղթերն ուղարկվել են նախաքննական մարմին։