ԵՄ-ն ցանկանում է խրախուսել Հայաստանի հակառուսական քայլերը. Ռուսական ԶԼՄ

Եվրամիությունը Հայաստանի իշխանություններից պահանջում է կրճատել ռուսական բիզնեսի ներկայությունը ռազմավարական ոլորտներում, խզել հումանիտար կապերը Ռուսաստանի հետ և ճնշել այդ քաղաքականությանը դեմ հանդես եկող ներքին ընդդիմախոսներին։ Այս մասին հայտարարել է Ռուսաստանի Արտաքին հետախուզության ծառայության (ԱՀԾ) մամուլի բյուրոն։

ՌԴ ԱՀԾ-ի հայտարարության համաձայն՝ Բրյուսելում գիտակցում են, որ եթե Հայաստանը դուրս գա Եվրասիական տնտեսական միությունից (ԵԱՏՄ), երկիրը կարող է բախվել խորը տնտեսական ճգնաժամի։ Նշվում է նաև, որ եվրոպական մի շարք երկրներ պատրաստ չեն իրենց շուկաները բացել հայկական ապրանքների համար՝ ի վնաս սեփական արտադրողների։

Միաժամանակ, ԱՀԾ-ի պնդմամբ, Եվրամիությունը կշարունակի հավաստիացնել Երևանին իր աջակցությունը, իսկ գործնական օգնության ուշացումները կբացատրի Հայաստանի՝ եվրաինտեգրման ճանապարհին ունեցած ձեռքբերումներով։

Հայտարարության մեջ նաև նշվում է, որ ԵՄ-ն նախատեսում է խրախուսել Հայաստանի հակառուսական քայլերը՝ վիզային ռեժիմի ազատականացման հեռանկարների և այլ խոստումների միջոցով։

Ռուսաստանի Արտաքին հետախուզության ծառայության այս հայտարարության վերաբերյալ Հայաստանի կամ Եվրամիության պաշտոնական արձագանքը դեռևս չի հրապարակվել։