Ռուսաստանը սպասում է ԱՄՆ-ի նոր առաջարկներին՝ Ուկրաինայի հարցով. Պեսկով

Ռուսաստանը պատրաստ է քննարկել ԱՄՆ-ի նոր առաջարկները Ուկրաինայում հակամարտության կարգավորման վերաբերյալ, սակայն դրանք պետք է համապատասխանեն ռուսական շահերին։ Այս մասին հայտարարել է Կրեմլի խոսնակ Դմիտրի Պեսկովը։

Նրա խոսքով՝ եթե խաղաղ կարգավորման հեռանկար չլինի, Ռուսաստանը կշարունակի ռազմական գործողությունները՝ մինչև իր առջև դրված նպատակների իրականացումը։

«Սա նախընտրելի ճանապարհը չէ, սակայն խաղաղ հեռանկարների բացակայության պայմաններում մենք կգնանք մինչև վերջ, մինչև լիակատար հաղթանակ։ Միաժամանակ կսպասենք նոր առաջարկների։ Ամերիկացիներն անկեղծ են, նախագահ Թրամփն անկեղծ է, և նրա բանակցողները նույնպես անկեղծորեն փորձում են մշակել բոլորի համար ընդունելի տարբերակներ»,- ասել է Պեսկովը։

Նա նշել է, որ նախորդ կարգավորման տարբերակը Ռուսաստանն ընդունել էր, սակայն այն մերժվել էր Ուկրաինայի կողմից։ Պեսկովի խոսքով՝ ԱՄՆ-ին չի հաջողվել փոխել Կիևի դիրքորոշումը, որի վրա, ըստ նրա, ազդեցություն են ունեցել եվրոպական երկրները։

«Մենք բաց ենք նոր առաջարկների և քննարկումների համար։ Սակայն դրանք առաջին հերթին պետք է ընդունելի լինեն մեզ համար»,- ընդգծել է Կրեմլի խոսնակը։

Ավելի վաղ ԱՄՆ պետքարտուղար Մարկո Ռուբիոն հայտարարել էր, որ ուկրաինական հակամարտության կարգավորման համար անհրաժեշտ են նոր գաղափարներ և մոտեցումներ, իսկ ՌԴ ԱԳ նախարար Սերգեյ Լավրովը նշել էր, որ Մոսկվան կատարել է ԱՄՆ-ի հետ Անքորիջում ձեռք բերված պայմանավորվածությունները։